RTWPB motuki sa petisyon sa pamuo

CEBU, Philippines - Gipasalig ni Department of Labor and Employment DOLE-7 regional director ug chairman sa Regional Tripartite Wages and Productivity Board (RTWPB-7) Elias Cayanong nga ilaha dayong tukion pagsuta kun balido ba ang giduso nga petisyon alang sa dugang P120.40 nga usbaw sa suholan sa mga mamumuo dinhi sa Sugbo.

Matud ni Cayanong atol sa interbyu sa Bantay Radyo nga i-convene niya karung sunod semana ang mga sakop sa board aron tukion ang unod sa maong petisyon nga giduso sa Cebu Labor Coalition nga gipangulohan sa Alliance of Progressive Labor (APL).

Kung masutang balido ang petisyon isunod dayon ang pagtakda sa ipahigayong konsultasyon sa sektor sa mga negosyante gikan sa lalawigan sa Bohol, Negros Oriental, Siquijor ug dinhi sa Sugbo kabahin sa maong gipangayo nga umento sa suhulan.

Nagkanayon si Cayanong human nila makuha ang sentimiyento sa habig sa mga negosyante isunod dayun nila ang public hearing aron dapiton ang duha ka habig ug ang masabutan ilang ipadala sa kaulohan. - BANAT NEWS