CEBU, Philippines - Kusganong gihimakak ug giinsister sa mga gitumbok nga suspek sa pagdagit ug pagpatay sa 6-anyos nga si Ellah Joy Pique ang mga alegasyon batok kanila ug miingon nga nasaypan lang sila.
Ang mga suspek nga sila si Sven Erik Berger ug ang registered nurse nga si Karen Castro Esdrelon kasamtangang gitanggong sa kapolisan sa Cebu Provincial Police Office alang sa pagpasaka og kaso karong adlawa.
Ang inahan ni Esdrelon nga si Josie mipadayag nga ‘mistaken identity’ ang nahitabo sa iyang anak ug sa hinigugma niini sanglit walay sala ang iyang anak ug gitudlo lang sa mga pulis nga maoy suspek sa pagdagit ug pagpatay kang Pique.
“Sobra ang pagpakauwaw (mga pulis) sa akong anak ug sa among kaliwat, klaruhon lang nila, ingon sila naay patik ang langyaw, tan-awa ninyo kun duna ba nay patik,” matud sa inahan ni Esdrelon.
Ang mga suspetsado mipadayag usab nga nagtuo silang makalingkawas ra sila sa maong pasangil sanglit aduna silay mga lig-ong mga ebidensya nga makapamatuod nga dinhi ra sila sa dakbayan ug Lapulapu atol sa pagkahitabo.
Si Ellah Joy gisignit diha sa Calajoan, Minglanilla niadtong Pebrero 8 ug napalgang patay pagkasunod adlaw diha na sa lungsod sa Barili. Ang mga testigos miingon nga usa ka Filipina ug usa ka langyaw ang midagit sa bata.
Ug ning maong kalamboan positibong giila sila si Esdrelon ug Berger sa mga batang testigos.
Si Sr. Supt. Erson Digal masaligong lig-on ang ilang kaso batok sa duha.
Apan si Atty. Salvador Solima, abogado sa mga suspetsado nga mibisita kagahapon sa CPPO, miinsister nga inosente ang iyang kliyente sanglit dunay ‘itinerary’ ang mga lakaw sa iyang kliyente gikan sa pag-abot sa langyaw hangtud na sa ilang pagdakop.
Ug kini mipakagamay sa pangangkon sa kapolisan nga lig-on ang ilang kaso tungod sa testimonya sa mga batang testigo sanglit matud pang Solima ang mga bata mahimo rang matudloan sa mga pulis aron itudlo iyang kliyente.
Si Berger miawhag sa kapulisan nga palawman ang imbestigasyon aron madakpan ang tinuoray nga mamumuno sa biktimang si Ellah Joy. Gikatakdang pasakaan og kaso karong adlawa ang duha diha sa piskalya.
Samtang irekomendar sa kapulisan nga ipailawom sa witness protection program ang mga batang saksi.
Si Atty. Kit Enriquez, usa sa mga legal counsel sa pamilya sa biktima nagkanayon nga huyang ang ‘alibi’ nga rason nga gipangangkon sa mga suspek sanglit bug-at ang positibong pag-ila sa mga testigo.
Ang Integrated Bar of the Philippines (IBP) sa dakbayan ug probinsya miabag usab niining maong kaso kun gikinahanglan.