CEBU, Philippines - Gumikan sa paghupot og ilegal nga drugas nasikop ang usa ka babaye diha sa sitio Torril, sa barangay Canjulao sa dakbayan sa Lapulapu sa milabay’ng hapon.
Ang nasikop mao si Juanita Empenado, 27, residente sa maong dapit kinsa giingong nakuhaan og usa ka paketeng gituohang shabu atol nga naghatud og warrant of arrest sa usa ka pinangita sa balaod diha sa maong dapit ang kapolisan.
Matud pa sa kapolisan nga usa ka Leonardo Mabano nga may kasong frustrated homicide unta ang hatdan sa maong warrant of arrest sa kapolisan dihang ilang nasigpatan si Empenado nga kadudahan og lihok hinungdan nga ila kining gisita.
Atol sa pagsita kang Empenado nakuha sa posesyon niini ang usa ka pakete sa gituhoang shabu hinungdan nga kini gisikop. Apan si Empenado hugtanong mihimakak nga usa siya ka drug pusher.
Kasong kalapasan sa Akta Republika 9165 ubos sa Section 11 sa Artikulo II ang ipasakang kaso batok ni Empenado. - (BANAT NEWS)