CEBU, Philippines - Gitambongan ni Gobernador Gwendolyn Garcia ang Presentation sa AdCongress Executive Committee didto sa opisina sa Advertising Board of the Philippines, sa Legaspi Village, Makati City.
Kauban niya ang mga provincial board member nga gipangulohan ni Bokal Agnes Magpale.
Kini agi og pagsanong sa gobernador sa usa ka suwat pagdapit kaniya gikan sa Advertising Board niadtong Pebrero 4 ning tuiga.
Ang mahinungdanong katuyoan sa gobernador sa iyang pagtambong sa maong tigum mao ang pagsabwag niya sa mga kasayoran nga ang lalawigan sa Sugbo maoy usa sa ilang napili nga lugar nga maoy mo-host o moalagad sa dakong kalihukan nga ilang ipahigayon ning tuiga nga mao ang 22nd Philippine Advertising Congress.
Matud pa ni Capitol Consultant on Information, Revenue Generation and Compliance Rory Jon Sepulveda nga ang gobernador dako kaayo og panglantaw nga ang maong prestihiyosong Philippine Ad Congress ipahigayon dinhi sa Sugbo tungod sa namatud-an na nilang kalig-on sa liderato ni Gobernador Garcia.
Iya usab nga gibutyag nga ang maong kalihokan dako gayud kaayo og matampo sa paglambo sa ekonomiya sa Sugbo ilabi na sa turismo sa lalawigan. - (BANAT NEWS)