Ulitawong way valentina naghikog

CEBU, Philippines - Nalungag ang ulo sa usa ka construction worker human gituohang nag-unay og pusil sa iyang kaugalingon nga gituohang nag-problema tungod sa gugma atol sa bisperas sa Valentines Day niadtong Domingo sa alas 10:30 sa gabii sa Hill-Top, Poblacion lungsod sa Dalaguete.

Ang nagpakamatay giila sa kapulisan nga si Felix Matugas, Jr. 21, construction worker ug nagpuyo sa nahisgutang lugar.

Matud ni PO3 Christopher Requina sa Dalaguete Police Station dihang nahinabi sa Banat News si Matugas nakit-an nalang sa iyang amahan nga si Felix Matugas Sr., nga nagbuy-od nga wala nay kinabuhi sulod sa payag gawas sa ilang pinuy-anan nga nagkadugo tungod sa samad pinusilan sa tuong bahin sa ulo niini.

Ang mirespondeng mga polis pinangulohan ni SPO2 Clito Pia naka-recover sa crime scene sa kalibre 357 rebolber ug lima ka buhing bala sa kalibre .38 sulod sa tambor niini ug laing usa ka kabhang sa bala sa .38 kalibre sulod sa tambor tupad sa patay’ng lawas sa biktima.

Apil sa na-rekober sa kapulisan ang usa ka suicide note nga padayon pa karung gisusi sa kapulisan apan dunay mga tabi-tabi sa mga molupyo sa maong lugar nga unod sa maong suicide note posibleng kabahin sa kahiubos niini may labot sa iyang hinigugma.

Ang amahan sa biktima nga si Felix mipadayag atol sa pagsukitsukit sa kapulisan nga pipila ka gutlo sa wala pa ang hitabo nakabati sila og usa ka lanog sa buto sa armas ug dihang iyang gisusi nakit-an nalang niya ang anak nga nagbuy-od na.   - (BANAT NEWS)