Nangawat og P100 mil sa amo priso

CEBU, Philippines -    Nagtingkagol sa Oslob detention cell ang usa ka 35-anyos nga lalaki kinsa suspetsadong mikawat sa P100 mil sa iyang amo didto sa merkado publiko sa barangay Poblacion, lungsod sa Oslob sa miaging adlaw.

Ang suspetsado giila sa mga polis nga si Jimmy Odena, ulitawo, taga barangay Bulan, lungsod sa Santander ug kanhi trabahador sa Junlyn Enterprises nga nahimutang sa merkado publiko sa Oslob ug gipanag-iya ni Evelyn Luna Erauda, 51-anyos.

Si PO1 Alan Villasurda sa Oslob Police Station nga nahinabi sa Banat News kagahapon mibutyag nga mikabat sa P100 mil ang kantidad sa kwarta nga giingong gikawat ni Odena.

Matud ni Villasurda nga niadtong Huwebes sayo sa buntag giingong gilungkab ni Odena ang kahon nga gibutangan sa nahisgutang kwarta didto sa cashier’s booth apan nadiskitaan kini ni Erauda niadtong Sabado na sa buntag.

Human sa pagpang-lungkab giingong si Odena nanabi nga nakadaog siya sa “swetres” ug nanghatag kini og kwarta ngadto sa iyang mga kauban sa trabaho isip “balato” o “meron”.

Ug human niadto wala na mo-report sa iyang trabaho si Odena ug wala magpahibawong miuli kini ngadto sa Santander.

Ang mga kauban ni Odena gipaimbestigar sa ilang amo sa mga polis ug nahibaw-an nga si Odena nanghatag kanila og kwarta.

Si Odena giapas sa mga polis didto sa Santander ug nasayran sa kapolisan nga ang suspetsado mibangka og inom sa iyang mga higala ug silingan tungod kay nakadaog siya sa swetres ug gawas pa niini namalit pa og mga materyales alang sa instalasyon sa kuryente sa ilang balay.

Matud ni Villasurda nga si Odena kinsa kapin pa lang sa buwan nga nagtrabaho sa nahisgutang tindahan miangkon nga siya maoy milungkab sa kahon ug mikuha sa kwarta sa iyang amo.

Si Odena gikatakdang pasakaan karong adlawa og kasong qualified theft sa Provincial Prosecutors Office.

Senior nga 80 edad hataga’g hinabang

Ni Sanden Anadia

Kasamtangang giandam sa hepe sa Office of the Senior Citizens Affairs (OSCA) sa siyudad sa Sugbo ang plano nga kahatagan og financial assistance ang nagpangedaron og 80 anyos pataas bisan pa kun dili na kini aktibo sa pagbotar panahon sa piniliay.

Si Guillermo Casinillo nga maoy presidente sa OSCA nagkanayon nga ang iyang plano iyang gihan-ay pag-ayo tungod kay daghang mga edaran ilabi na ang nagpuyo sa kabukiran nga maglisod na sa pagbotar panahon sa eleksyon gumikan sa dili maayong kondisyon sa ilang lawas.

Kahinumdoman nga ang Financial Assistance Program alang sa mga senior citizen sa siyudad unang gisugdan pagpatuman niadtong 2009 apan ang nakapahimulos niini mao ra kadtong mga rehistradong botante.

Suma pa ni Casinillo    nga makiangayon kaayo nga makadawat og financial assistance ang 80 anyos pataas nga senior citizen gumikan sa estado sa ilang panglawas.

Dugang pa niya nga kinahanglan nga makapamatuod ang aplikante nga residente gyud siya sa siyudad sa Sugbo.

Iagi usab sa bug-at nga pagtutok ang kahimtang sa mga senior citizen nga makapahimulos sa maong programa ug pihoon kun taga dakbayan ba gayud sila sa Sugbo. Wala pa hinuon hisgoti ni Casinillo kun kanus-a niya i-presenta ang maong plano ngadto sa mga dagkong opisyal sa siyudad.

Sa laing bahin daghan kaayong mga senior citizen nga nangreklamo tungod kay hangtod karon wala gyud sila makadawat sa P4 mil nga financial assistance alang sa tuig 2010.(Sanden J. Anadia)

Wa mouli sa motor gidunggab angol

Ni Romeo T. Limpangog

Grabeng naangol ang usa ka tawo nga gidunggab sa kapuyo sa iyang manghod alas-9 pasadso ang takna kagahapon sa buntag sa Soco Village sa barangay Pagsabungan, dakbayan sa Mandaue.

    Ang biktima mao si Gilbert Ramas, 34, nagpuyo sa maong dapit ug ang nakadunggab mao si Bryan Pilapil, giingong taga barangay Tisa sa dakbayan sa Sugbo.

    Si SPO3 Edgardo Pasaylo nga nahinabi sa Banat News miingon nga sayo pa sa buntag nga nagkalalis ang biktima ug suspetsado nga ang hinungdan mao ang dugay niining giuli ang gihuwamang motorsiklo ug nahanaw pa ang P2,000.

Matud pa ni Pasaylo nga sa miaging gabii pa gihulaman sa suspetsado ang motorsiklo nga gipanag-iya sa igsuong lalaki sa biktima maong kini gisukmatan sa biktima.

Miulbo pa ang panaglalis dihang giablihan sa biktima ang tool box compartment sa motorsiklo ug nahibaw-an nalang niyang nahanaw na ang gibutang nga salapi nga nagkantidad og P2,000.

Gipasangil sa biktima nga gikuha sa maong suspetsado ang maong salapi apan ang suspetsado nga wala mahimuot niini ug daling mikuha og kutsilyo sa ilang kusina ug sa pagbalik kalit gihansakan ang dughan sa biktima apan nakasagang maong natapsingan ang liog niini ug nangasamad sa iyang mga bukton ug kamot tungod sa pagpanagang.

Human sa maong pagpanunggab ang suspetsado dali usab nga misibat pahilayo sa maong dapit ug wala na kini maabti sa mialarmang mga polis. (Romeo Limpangog)

Luigi nanghatag og gasa

Ni Chester Abadilla

Si 6th district Congressman Gabriel Luis Luigi Quisumbing nanghatag og Valentine’s Gift ngadto sa mga kabataan nga nangtungha sa barangay day care center sa sixto distrito didto sa Norkis Park sa barangay Centro siyudad sa Mandaue sa miaging Sabado.

Sa usa ka programa alang sa mga kabataan ubos sa "Share the love, Give a Toy Program" ni Quisumbing, ang mga bata gikan sa 84 ka mga day care center sa siyudad sa Mandaue, lungsod sa Consolacion, ug Cordova pulos nakadawat og mga duwaan ug mga school supply.

Apan sa wala pa ang panghatag sa maong mga gasa, si Quisumbing mihalad og story telling pinaagi sa pagbasa sa libro nga giulohan a "a fat cat."

Si Quisumbing miingon nga ang maong kalihokan usa ka sayo nga valentine celebration niya uban ang mga tinun-ang mga bata.

Kini tungod kay usa sa iyang giprayoridad nga programa karon mao ang paghatag og igong pundo alang sa edukasyon sa mga kabataan aron mahimo kining kwalipikado ug makaangkon sa dagkong mga oportunidad nga makatrabaho sa dagkong industriya sa umaabot nga katuigan.

Matud pa niya nga iyang giumol ang programa nga makabaton og study habit ang mga bata sa pagtuon ug pagbasa aron kun modako na kini kabahin na sa ilang working attitude ang pagtuon ug pagpaningkamot nga mapalambo pa ang iyang trabaho. (Chester Abadilla)

2 ka Koreano nadisgrasya

Ni Brenda Batuto

Duha ka Korean national ang nangaangol human madisgrasya ang ilang sakyanan didto sa lungsod sa San Francisco, Isla sa Camotes sa milabayng adlaw.

Ang mga biktima giila nga sila si Lim Hydong Jun, 30; ug Chei Yoon Mi, hingkod nga walay pihong address.

Nasayran sumala sa kapolisan nga ang duha giingong nagmaneho og sakyanan nga walay mga lisensiya.

Base sa mensahe nga gipadala ni Inspector Socrates Medillo, hepe sa San Francisco Police Station ngadto kang Senior Superintendent Erson Digal, hepe sa Cebu Provincial Police Office (CPPO) nga ang mga biktima didto dad-a sa Chong Hua Hospital sa dakbayan sa Sugbo tungod sa nasinating kadaot sa ilang lawas.

Sa mensahe ni Inspector Medillo nagkanayon nga ang isla sa Camotes black out hinungdan nga dili nila mapadala dayon ang spot report sa maong insidente.

Ang Banat News misuway sa pagtawag ngadto sa San Francisco Police Station apan dili ma-contact ang ilang telepono.

Gawas niini si Medillo gitawagan usab sa Banat News kagahapon sa hapon ang mga numero sa iyang cellular phone aron makakuha og dugang detalye sa hitabo apan wala kini motubag sa tawag busa wala hisayri kun usang matang sa sakyanan ang gisakyan sa mga biktima. (BANAT NEWS)