CEBU, Philippines - Patay nga lawas sa wala pa hiilhing lalaki napalgang gigapos ug gibaatan ang baba nga gisulod sa itom nga garbage bag ug gilabay sa kilid sa national highway sa sitio Palalong, sa barangay Guimbuangan, lungsod sa Barili ala-una pasado ang takna sa miaging kaadlawon.
Ang patay’ng lawas napalgan gibanabanang 100 metros sa unahan atbang nga bahin gikan sa pangpang diin napalgan ang patay’ng lawas sa gisignit nga 6-anyos nga si Ellah Joy Pique.
Si SPO2 Zaldy Orello sa Barili Police Station mihulagway nga ang maong patay’ng lawas nga nakaplagan nakabaton og samad pinusilan sa ulo nga gituohang maoy nakaingon sa kamatayon niini.
Matud pa ni SPO2 Orello nga ang maong patay’ng lawas nga napalgan gibanabanang anaa na sa 30 kapin ang panuigon ug gamayon ang panglawas ug 5’5 ang gitas-on.
Dugang pa niya nga nagsul-ob ang maong patay’ng lawas og puti nga t-shirt nga may sapaw nga itom t-shirt ug short pants nga gigapos ang duha ka mga kamot ug gisulod sa itom nga garbage bag nga itom.
Sumala pa nga gitaptapan usab ang iyang baba ug mata. Ang gitaptap sa mata adunay nakasuwat nga “Piyait must die.” Samtang sa puti niini nga t-shirt adunay gisuwat nga “Idol ko si Angelo Reyes, Kawatan ko.”
Tungod sa maong gipanuwat diha sa patay’ng lawas mitumaw ang pagdudang posibleng adunay dautang record ang biktima.
Si SPO2 Orello miingon nga sa crime scene ilang napalgan ang kabhang sa kalibre 45 nga armas nga gituohang maoy gigamit sa nga hinagiban sa pagpatay sa biktima sa wala hiilhing mamumuno niini.
Kasamtangang gipahiluna ang patay’ng lawas sa maong wala hiilhing lalaki diha sa Tupas Funeral Home sa lungsod sa Carcar alang sa pagahimuong autopsy niini.
Nunot niini giawhag sa kapolisan ang si bisan kinsang adunay wala mahiuli nga sakop sa pamilya sa pagsusi sa Tupas Funeral Home sa lungsod sa Carcar. (BANAT NEWS)