Magtiayong mag-uuma gitulisa'g P25 mil

CEBU, Philippines - Gitulis sa gibanabanang upat ka mga armadong lalaki ang magtiayong lolo ug lola nga negosyante sa bukirang bahin sa barangay Kantubaon sa lungsod sa Tabuelan niadtong Biyernes sa gabii.

Ang biktima mao sila si Tarcilo Abanera, 62, asawa, niining si Wilhelima Abanera, 58, molupyo sa maong lugar ug negosyante og mga utanon ug uban pang lagutmon sa maong dapit.

Samtang ang upat ka mga tulisan gihulagway lang sa mga biktima nga hamtong ang panuigon ug dili maklaro ang panagway tungod kay pulos nagtaptap og t-shirt sa ilang mga nawong ug armado sa wala matinong kalibre sa armas.

Matud pa ni PO2 Gilbert Allego sa Tabuelan Police dihang nahinabi sa Banat News nga ang mga biktima mao ray nagpuyo sa maong balay ug dihang nahitabo ang pagpanulis nanihapon pa ang duha.

Sumala pa kalit nga miabot ang mga tulisan pinaagi sa pagsikad sa ilang pultahan ug naguba kini hinungdan nga nakasulod ug diretsong mition kanila og armas dayong deklarar og tulis.

Ang mga biktima nga gibati og kahadlok niadtong tungura napugos og hatag sa P25 mil nga kwarta nga ilang halin sa mga abot nga utanon niini ug pananom ug ang bahin sa ilang yuta nga gitikad.

Human makuha ang kwarta yano ra kaayo nga nanglakaw paingon sa gawas ang mga tulisan samtang ang magtiayon igo nalang sa pagdangop sa buhatan sa kapulisan niana nang pagkabuntag. Hinuon gibutyag ni PO2 Allego nga duna na silay lead kun si kinsa ang mga tulisan. (BANAT NEWS)