Dalaga gitulis sa nagmotor

CEBU, Philippines - Mikabat sa P5 mil kapin ang nasakiyo sa tulisang de motor gikan sa gitulis niining usa ka tag-iya og sari-sari store didto sa barangay Cogon West, lungsod sa Carmen sa miaging kaadlawon.

Si PO3 Edgardo Papaya, sa Carmen Police Station miila sa biktima nga si Maria Fatima Darro Villamor, 37, dalaga nga taga barangay Boyo Fuente, sa maong lungsod, nga may sari-sari store sa maong lugar.

Sumala sa kapolisan sa Carmen nga human mangabli   ang biktima sa iyang tindahan nianang alas 4:00 sa kaadlawon, gibilin kini sa iyang tindera kay nag-atang siya og sakyanan paingon sa dakbayan sa Sugbo diin siya nagtrabaho.

Apan samtang nagbarog sa daplin sa karsada kalit lang gihunongan sa usa ka motorsiklo nga gisakyan sa duha ka tawo ug ang angkas maoy mikanaog nga nagbitbit og armas de fuego dayong duol ngadto sa biktima.

Pagkakita sa biktima nga armas de fuego ang dala sa tawo, mikaratel siya og dagan ngadto sa iyang tindahan, apan gigukod siya sa tulisan ug dihang didto na siya sa tindahan wala na siya kalihok dihang gihulga siyang pusilon kun dili niya ihatag ang iyang bag ngadto sa tulisan.

Sa kahadlok nga mapusilan, gitunol sa biktima ang iyang bag nga may P5 mil cash, ug uban pang personal niyang mga butang.  (BANAT NEWS)