CEBU, Philippines - Naglaom ang 168 ka mga pamilya nga nagpuyo sa sitio San Miguel, barangay Apas niining dakbayan sa Sugbo nga makakuha og positibong tubag sa gipangayo nilang tabang sa kagamhanan sa siyudad aron mapugngan ang nag-ung-ong nga demolisyon sa ilang dapit.
Nasayran nga mapupos sa katapusang bahin sa Marso ang gihatag nga extension sa korte sa pagpuyo sa mga residente sa maong dapit diin ang yuta gipanag-iya sa banay’ng Godinez.
Sumala pa ni barangay kagawad Allan Mahait nga kinahanglan nga ipatigbabaw ang katungod sa mga residente ug angayan hingusgan ang City Ordinance No. 1772 kalabot sa pagdeklarar niini nga socialized housing site.
Dugang pa niya nga mipasalig hinuon ang siyudad nga mahilot ang maong suliran pinaagi sa buhatan ni City Attorney Joseph Bernaldez.
Tun-an sa siyudad ang mga ebidensya aron maluwas ang mga residente nga nabalaka na pag-ayo sa estado sa ilang pagpuyo.
Kasagaran sa mga sakop sa Archangels Residents Mergence Inc. kay nagpuyo na sa maong dapit gikan sa 50 ngadto na sa 60 ka tuig.
“Protektahan gyud namo ang katungod sa mga tawo maong nihimo gyud mi og resolution aron mag-awhag sa city government nga manginlabot sa sitwasyon,” nagkanayon si Mahait.
Matud pa nga lisod kaayo ang sitwasyon kung basta lang papahawaon ang mga tawo sa nahisgutang dapit kay dinhi na kini sa siyudad ang tinubdan sa ilang panginabuhian samtang ang ilang mga anak dinhi usab nag-eskwela. (BANAT NEWS)