Demolisyon malinawon

CEBU, Philippines - Mapasigarbuhong gipahibalo sa hepe sa Squatters Prevention and Encroachment Elimination Division (Speed) nga si Noel Artes nga wala sila makasugat og mga bayolenteng reaksyon sa mga pamilya nga apektado sa padayon nilang demolisyon sa mga estraktura duol sa mga kasapaan.

Miabot na ngadto sa 28 ka mga balay ang naguba sa Speed ug aminado si Artes nga usa sa nakapalangay nila mao ang kalig-on sa flooring sa balay diin lisod kaayo gun-ubon sa ilang ekipo.

Malipayon hinuon si Artes nga dunay ubang pamilya ang boluntaryong miguba sa ilang mga balay.

Nasayran nga gisugdan na usab og hatud sa ilang mga personnel ang pamilya paingon ngadto sa tagsa-tagsa nila ka probinsya.

Samtang usa ka residente sa barangay Mabolo nga si Lea Resteciliano, 47, ang mipaambit dinhi sa Banat News nga miboluntaryo na lang gyud siya og guba sa ilang panimalay gumikan kay dili matag-an ang dagan sa panahon.

“Mas maayo nga ako na lang gyud ang maglikay, modako pa lang og kalit ang baha, ayaw ko ingna nga diha pa ko mohimo og aksiyon,” nagkanayon si Resteciliano.

Apan si Rey Liego, 21, tinun-an sa kolehiyo mipadayag nga sakit kaayo sa iyang buot ang paghawa sa ilang pwesto apan wala siya’y mahimo sanglit mao man kini ang kamandoan sa gobiyerno.

“Duna man pud sila’y punto kung nganong angay mi pahawaon. Motuman na lang ta aron dili pud mi madisgrasya kung dunay dautang panahon,” nagkanayon si Liego sa dihang nahinabi sa Banat News kagahapon. (BANAT NEWS)