Rama di na mopahulam sa trak sa DPS sa kabarangayan sa siyudad

CEBU, Philippines - Tungod sa nahitabong disgrasya nga gikalambigitan sa trak sa basura sa Department of Public Services (DPS) sa dakbayan sa Sugbu gipahibalo ni Mayor Michael Rama nga dili na mahimong hulman ang mga garbage truck sa City Hall ngadto sa mga barangay.

Niadtong milabay’ng Huwebes sa hapon, duha ka tawo ang nakalas ug unom ka tawo ang naangol human mawad-i og brake ang trak sa DPS nga gigamit sa barangay Kalunasan ug midaro sa usa ka shop sa sitio Opra sa maong barangay.

Ang maong trak gimaneho sa drayber sa barangay nga si Gerardo Lasangi miingon nga naguba ang brake maong wala niini mapugngi ang maong trak.

“Pirmi gyud na nako nga gipahinumdom nga kung dili gani makaya sa barangay nga mokuha sa ilang mga basurahan. Ang City na gyud ang mokuha ana, ug dili na kinahanglan nga mang-ulos sila og garbage truck sa city,” matud pa sa mayor.

Gipasabot sa mayor nga kung gubaon ang mga garbage truck sa barangay ang kagamhanan una sa siyudad ang temporaryong mohakot sa ilang mga basura ug dili na manghuwam.

Gimando ni Rama kang Department of Public Services (DPS) nga si Engr. Dionisio Gualisa nga ang mga drayber mismo sa ilang departamento ang mokuha sa mga basuraha ug dili tugutang mogamit niini ang mga drayber sa barangay.

Samtang buot usab ipasusi ni Rama ang tinuoray nga estado sa maong sakyanan sanglit nakadawat siya og report nga brand new kini ug dili gubaon ang brake niini.

Misaad hinuon si Rama nga pinaagi sa Department of Social Welfare Services, tagaan niya og burial assistance ang mga nangamatay sa aksidente ingon man usab financial assistance alang sa mga nangaangol.

Gawas sa mga nakalas ug naangol kapin sa 20 ka mga motorsiklo ang gidaro sa maong garbage truck ug nangapislat.

Ang mga nangamatay mao sila si Elvie Mabatid, 25 ug Joseph de los Santos, 21, nga pulos mga residente sa maong barangay.

Samtang nangaangol sila si Charles James Bacunawa, 28; Shine Nicole Romanaso, 2; Alvin Medina, 32, ug ang drayber nga si Lasangi. (Sanden J. Anadia)