Tulo gihugon-hugon nga mag Kongresista sa 1st district

CEBU, Philippines - Duha pa ka tuig gikan karon ang paaboton alang sa sunod nga eleksiyon apan gihugon-hugon na nga ang bugtong anak ni Kongresista Eduardo Gullas nga si Gerald Anthony “Didi” Gullas ang modagan isip kongresista sa unang distrito sa probinsiya sa Sugbo sa sunod nga eleksiyon.

Daghan ang nagtuo nga si Didi maoy mopuli sa pwesto sa iyang amahan ngadto sa Kongreso kinsa last termer na karon.

Ang mga sakop sa oposisyon sa dakbayan sa Talisay nagtuo usab nga si Didi maoy mopuli sa iyang amahan nga kongresista sa tuig 2013 election.

Ang maong mga pagtuo mitumaw dihang si Didi mitugot nga ibitay ang iyang dakung hulagway sa tarpaulin diha sa merkado publiko sa barangay Tabunok.

Ang maong gibitayan sa tarpaulin nga hulagway ni Didi makita kini sa mga mobiyahe paingon ngadto sa habagatan.

Hinuon ang Alayon nga partido sa kongresista wala pa moluwat og pamahayag kabahin sa plano ni Didi sa politika.

Sa milabay’ng eleksiyon si Didi ang giingong aktibo kini ngadto sa pagsuporta sa mga kaalyado nilang mga kandidato.

Apan gawas kang Didi migawas usab ang hugon-hugon nga si Mayor Valdemar Chiong sa dakbayan sa Naga ug Mayor Antonio “Abby” Canoy sa lungsod sa San Fernando mokandidato usab sa 2013 election isip mga kongresista.

Si Chiong kinsa ubos sa landong sa Alayon ug ubos karon sa ikaduhang termino sa iyang pagka-mayor sa Naga mikatawa pagkahibawo sa nahisgutang report ug matud usab niya nga wala kini sa iyang planong mokandidato isip kongresista sa unang distrito.

Si Canoy kinsa dili ubos sa landong sa Alayon ug ubos sa iyang unang termino karon isip mayor sa San Fernando wala moluwat og pamahayag kabahin sa maong report.

Kahinumduman nga si Canoy sa wala pa kini mapiling mayor sa San Fernando niadtong tuig 2010 nakaserbisyo na kini isip mayor sa lungsod sa unang tulo ka termino sa wala pa siya mapiling bise mayor sa lungsod. (BANAT NEWS)