P211 M nga budget sa CCMC kuwang-Sedoripa

CEBU, Philippines - Ang hepe sa Cebu City Medical Center (CCMC) nga si Eduardo Sedoripa miklaro nga pulos maayo ang ilang mga doktor apan duna la’y usahay nga malangan ang paghatag niini og serbisyo gumikan sa kakuwang sa mga pasilidad.

Kini maoy reaksiyon ni   Sedoripa sa   mga negatibong komento sa ubang mga tawo kalabot sa serbisyo sa CCMC.

Matud usab niya nga gibuhat nila ang tanan aron lang gyud mahatag ang dinaliang serbisyo bisan pa man sa ka limitado sa ilang mga resources.

Mokabat ngadto sa P211 milyones ang budget sa CCMC karong tuiga ug mao kini ang paningkamutan ni Sedoripa nga mabahin ngadto sa mga panginahanglanon sa tambalanan.

Apan iyahang giangkon nga kuwang ang maong budget hinuon iyang gipasalig nga adto kini ihapak sa nag-unang panginahanglanon sa pasyente sama sa medisina, pasilidad ug ang pagpalapad sa tambalanan aron makadawat na kini og daghang pasyente.

Samtang ang administrative officer sa CCMC nga si Rey Cris Panugaling mibutyag nga mi-request na sila sa kagamhanan og dugang mga personnel aron mapalambo ang ilang serbisyo.

“Seguro sa March makakuha ta og bag-ong update sa pag-request nato og mga personnel. Dili man gud na madali-dali kay taas kaayo ang process. Unya i-check pud na kung   makaya pa ba sa budget,” nagkanayon si Panugaling.

Ang direktor usab sa Surgical Department   sa CCMC nga si Dr. Louis Anthony de los Reyes mipahibalo nga target nila karong tuiga nga   mopalit og mga bag-ong teknolihiya aron mapalapad nila ang ilang serbisyo.

“Kuwang gyud mi og manpower, kay dapat gani unta, usa ka nurse sa tulo ka mga pasyente pero ang nahitabo karon kay sa 13 ka mga pasyente, usa ra ang nurse ang na-assign,” matud pa ni de los Reyes.

Si Mayor Michael Rama mipasalig nga tagaan niya og pagtagad ang mga problema sa CCMC ug palig-onon usab niya ang kasamtangang health program sa siyudad.

Nasayran nga padayon karon nga naglihok ang Department of Social Welfare and Services (DSWS) aron masuta kung kinsa kadtong mga kabus aron matagaan og card sa Philhealth.

Gawas niini, migahin usab ang siyudad karon tuiga og P100 million aron ipadayon ang City's Hospitalization Assistance and Medicines Program (CHAMP) alang sa mga kabos nga residente sa siyudad.  (BANAT NEWS)