Imbistigasyon sa AFP ipadayon

CEBU, Philippines - Si 6th district Cong. Gabriel Luis Luigi Quisumbing mibutyag sa iyang hugot nga baruganan nga kinahanglang magpadayon ang Congressional Investigation kalabot sa gikagubtang isyu bahin sa graft and corruption sa Armed Forces of the Philippines bisan pa man sa kamatayon ni kanhi Defense Secretary . Angelo Reyes.

Matud pa ni Quisumbing nga dili angay mabalda ang imbestigasyon sa pangawkaw sa AFP tungod kay ang mga magbabalaod igo lamang naghimo sa ilang constitutional mandate kun katungdanan sa pagpahigayon og investigation in aid of legislation aron matapos na ang pinakaugat sa korapsyon sa militar.

Si Quisumbing midugang nga ang estelo ug pamaagi sa pagpangutana sa mga kongresista incidental lamang sa kinatibuk-ang katuyoan aron makab-ot ang kamatuoran ug makatabang sa paghatag sa solusyon pabor sa interest sa kinabag-ang Filipino.

Sigun pa ni Quisumbing nga luyo sa kamatayon ni Reyes dili did-an ang mga kongresista sa pagtuman sa ilang kinaugalingong estelo sa pagpangutana ug pagsukitsukit sa mga tawo nga gidudahan base sa alegasyon sa mga saksi sanglit kadtong mga may limpyong konsensiya dili gyud masayop ug andam nga muharong sa bisan unsang matang sa akusasyon.

Si Quisumbing, kinsa personal nga miduso og resulosyon sa kongreso nga nanawagan sa pag-review ug pag-investigate sa AFP budget and Financial system, usa ka semana sa wala pa maghikog si Reyes didto sa sulod sa Loyola Memorial Park, nagkanayon nga ang kongreso dili angayan nga magpadala sa karaan nga tradisyon nga "pakikisama" tungod kay bisan og mipadangat ang mga kongresista og mga pahasubo, dili angayan nga kalimtan na lamang ang iyang kalambigit sa korapsyon sa militar.

Buot si Quisumbing nga ang napagya nga corruption sa AFP kinahanglan nga dili maghikaw sa mga yanong mga sundalo sa ilang mga bayad og benepisyo ilabina sa namatay sa gubat tungod kay ang giisyu nga helmet, armas ug ubang mga ekipo iggugubat mga substandard o baratuhon ug dili dekalidad

Nagkanayon si Quisumbing nga ang katawhang Filipino dugay na kaayo nagpaabot nga kahatagan og reporma ang AFP hinungdan nga angayan nga ipadayon ang imbestigasyon aron manubag ang mga nangurakot ug mahibalik sa panudlanan sa gobyerno ang gikawkaw nga kwarta nga buhis sa katawhang Filipino. (BANAT NEWS)