Konseho sa Talisay suporta sa Drilon bill

CEBU, Philippines - Ang konseho sa dakbayan sa Talisay hugtanong misuporta sa Senate Bill No. 2655 kon “Disclosure of Local Transaction Bill” ni Senator Frankin Drilon.

Sa pagpakita og suporta sa nahisgutang bill niadtong Martes sa regular session sa konseho, mipasar sila og resolusyon nga gipangamahanan ni Konsehal Romeo Villarante sa oposisyon kinsa vice chairman sa Committee on Laws ug si Konsehal Edward Alesna kinsa chairman sa Committee on Good Governance ang mi-co-author sa maong resolusyon .

Si Villarante kinsa usa usab ka abogado mipasabot nga kung ma-aprobahan ang balaodnon ni Drilon ang tananng local government unit mopublikar na unya sa ilang mga financial record sa mga pamantalaan ubos sa mando sa maong balaodnon.

Gawas niini ang mga mayor sa kalungsoran ug dakbayan mohatag usab og kasayoran bahin sa annual budget diin padulong ang kwarta ug unsay mga gigastohan niini.

Ubos sa balaodnon ni Drilon ang tanang mga proyekto sa gobyerno kinahanglang ipaubos sa subasta ug ipahibawo gayud sa publiko. Matag upat ka buwan ang LGU kinahanglang may talaan ug sumada sa migawas nga kwarta gikan sa panudlanan sa kagamhanan.

Sa maong bill, ang LGU kinahanglang may pundo sa ilang Priority Assistance Development Fund, Special Education Fund ug uban pang mga kuwarta sa gobyerno.

Ang treasurer, accountant, budget officer ug uban pang executive mapriso sulod sa unom ka buwan o ba kaha dili makadawat sa ilang sweldo sulod sa unom ka buwan o kaha masuspenso sulod sa usa ka tuig kun mapakyas sa pag-publikar sa financial statement sa LGU isip silot kanila sa ilang paglapas sa balaod ubos sa maong balaodnon ni Drilon. (BANAT NEWS)