Kura paroko sa Danao gikasuhan sa kapolisan

CEBU, Philippines - Kasong reckless imprudence resulting to Frustrated Homicide ang gipasaka sa kapulisan batok sa pari nga aksidenteng nakapusil sa usa ka tinun-an nga mikatkat sa punoan sa mangga sulod sa compound sa kombento sa dakbayan sa Danao niadtong milabay’ng adlaw.

Matud ni SPO1 Matias Casas, Desk Officer sa Danao City Police dihang nahinabi sa Banat News si Fr. Jonathan Durano Lao, kura paruko sa Colegio de San Antonio de Padua aksidenteng nakapusil sa criminology student nga si Mark Robert Cecilio Ymbong, 19, gipasakaan na og kaso.

Ang imbestigador sa Danao City Police, SPO2 Allan Munoz mirekomendar sa kasong reckless imprudence resulting to frustrated homicide batuk kang Fr. Lao tungod kay aksidente lang ang pagkapusil niini gamit ang air gun.

Kini subay usab sa pamahayag sa helper sa simbahan nga si Avelina Manzo, nga miluwat og pamahayag nga nasuko ang pari nga migawas sa kwarto niini sa kombento tungod kay gisabaan kini sa biktima nga mikatkat sa mangga.

Matud pa wala mopatuo ang biktima dihang gibadlong sa pari hinungdan nga misulod kini og balik sa kwarto ug sa pagbalik nagbitbit na kini sa air gun nga nagsige og badlong sa biktima apan aksidente niining nakablitan ug naigo sa dughan.

Matud pa sa hepe sa kapolisan sa lalawigan sa Sugbo, Sr. Supt. Erson Digal, diha nga iyang personal nga nahinabi ang kura paroko mitug-an kini kaniya nga wala niya tuyo-a ug aksidente ang nahitabo. (BANAT NEWS)