Ellah Joy wala malugos - awtopsiya sa PNP

CEBU, Philippines - Wala lugosa ang batang gisignit ug gipatay kansang lawas diha na gilabay sa lungsod sa Barili niadtong milabay’ng Miyerkules sa buntag sumala pa sa PNP Crime Laboratory.

Pasado alas-2 sa kaadlawon kagahapon si Sr. Supt. Nestor Satur sa PNP Crime Laboratory mipahigayon og eksaminasyon sa patay’ng lawas ni Ellah Joy Pique sa Sacred Heart Funeral Homes.

Matud pa ni Satur wala silay nakitang gisi sa kinatawo sa bata nga makapamatuod nga kini gipahimuslan.

Apan ilang nakita nga ang hinungdan sa kamatayon sa bata mao ang pagbunal og gahi nga butang ngadto sa ulo niini nga maoy hinungdan sa pagkabuak sa bagul-bagol.

Samtang sa bahin sa hepe sa kapolisan sa lalawigan sa Sugbo, Sr. Supt. Erson Digal mibutyag kini nga sa ilang imbestigasyon posibleng sa wala pa patya ang biktima gipa-posing pa kini atubangan sa camera.

Dako ang pagtuo ni Digal nga isog ang maong bata ug posibleng misukol sa mga nagdagit kaniya hinungdan nga nabunalan kini sa ulo ug namatay.

Gisubay karun sa kapolisan ang anggulo nga cyber sex kini tungod kay aduna usab nahitabo sa lungsod sa Minglanilla nga susamang hitabo pipila na ka tuig ang milabay nga diin mga batang babaye ang mga biktima.

Dugang pa niini nga sa pagkakarun, aduna na silay mga pipila ka saksi nga magtumbok sa responsable sa pagkamatay sa biktima gani aduna nay cartographic sketch sa duha ka suspetsado.

Samtang kagahapong adlawa miduaw si Digal sa Minglanilla Central Elementary School diin ang tanang mga prinsipal sa tanang tunghaan sa maong lungsod nagtigom alang sa pagpalig-on sa ilang seguridad.

Matud pa sa prinsipal sa Central School nga si Ivo Adam Villordon, ilang ipatuman ang ID system sa mga ginikanan nga diin may dagway sa ginikanan ug sa anak nga ilang sugaton.

Samtang ang mga maestra usab ang responsable sa pagpagawas sa mga tinun-an ug kinahanglang maoy mopahibalo sa mga ginikanan sa oras nga buhian ang mga tinun-an samtang moduol sila sa munisipyo aron mangayo og security sa ilang mga ganghaan.

Nakig-alayon na karun ang kapulisan sa lungsod sa Minglanilla sa Anti Human Trafficking sa Police Regional Office (PRO)-7 ug sa Bureau of Immigration and Deportation (BID-7) aron pagtumbok sa langyaw nga suspek ug kauban niining Pinay nga babaye nga responsable sa pagdagit sa biktima.

Si Pique nga tinun-an sa grade-1 sa Calajoan Elementary School sa Minglanilla gidagit sa duha niadtong Martes sa hapon dili layo sa ilang tunghaan ug nakit-ang patay na sa bung-aw sa barangay Guimbuwangan sa lungsod sa Barili niadtong Miyerkules.

Wala nay sapot ug giputos og bed sheet ug gipatabanan og mga bato ang lawas niini una pa gibaatan og wire.

Matud pa sa hepe sa Minglanilla Police Station nga si Sr. Insp. Laurel Almerante naglisud gyud sila pag-trace sa maong sakyanan ug sa maong langyaw ug sa babaye niining kauban tungod kay dili kompleto ang plate number nga natiman-an sa mga saksi nga “679” lang.

Tungod niini tinguha karun sa kapulisan nga makig-alayon sa BID-7 aron katugutan ang mga saksi nga makatan-aw sa listahan sa tanang mga langyaw nga ania manimuyo dinhi sa Sugbo sa pamasin nga mamay-ungan kini sa mga saksi.

Nunot niini gi-awhag sab ni Almerante ang publiko ilabina kadtong mga molopyo sa mga silinganang lungsod pag-report dayun sa ilang buhatan sa numero 272-6662 kun dunay mamatikdan nga langyaw ug sakyanan nga susama sa maong deskripsyon aron mahimo-an dayun nila og pakisusi. (BANAT NEWS)