CEBU, Philippines - Mga batang biktima usab unta sa pagpanagit lima ka tuig na ang milabay sa dakbayan sa Naga mitumbok sa hulagway diha sa cartographic sketch sa kapolisan sa Minglanilla sa suspek sa pagpanagit ug pagpatay sa 6-anyos nga batang babaye sa barangay Calajoan, Minglanilla nga samang suspek nga misuway og dagit kanila kaniadto.
Ang maong mga bata pulos estudyante sa Guindarohan Elementary School sa Minglanilla nga kaniadto ang prinsipal karon sa Calajoan Elementary School mao si Ginalyn Craste. Ang langyaw giingong gibana-banang 40 pataas ang edad, 5’8 ngadto sa 5’10 ang height, kasarangan ang lawas, blond ang buhok ug taas ang ilong, mahigalaon samtang ang babaye lima ka tiil, morena ang pamanit ug taas ang buhok.
Ang cartographic sketch sa mga suspetsadong midagit ug mipatay kang Ellah Joy Pique nga gipakita sa DyAB positibong giila sa tulo nga sama sa hitsura sa mga misuway og dagit kanila.
Si Sr. Insp. Laurel Almerante, hepe sa Minglanilla Police Station nga gikahinabi sa Banat News mikompirmar nga aduna silay nadawat nga susamang impormasyon nga nahitabo niadtong 2006 sa barangay Guindarohan ug ilaha na karung gikuhaan og impormasyon ang maong mga biktima nga naluwas kaniadto.
Base sa report sa DYAB Abante pa Bisaya nga niadtong tuig 2006 adlaw’ng Sabado usa ka 9-anyos nga karon 14-anyos na nga batang babaye uban sa iyang 8-anyos nga manghod ug ig-agaw nagduwa-duwa diha daplin sa karsada duol sa ilang pinuy-anan sa usa sa mga barangay sa dakbayan sa Naga.
Usa ka sakyanan ang kalit mihunong sa tungod sa maong mga bata unya usa ka babaye ang nanaog ug nangutana kung asa ang Pangdan, Naga ug gibira og kalit si Jessa aron pasakyon sa sakyanan aron sila tultulan niini.
Apan matud ni Jessa nga nahadlok siya niadtong higayona tungod kay nakita niya diha sulod sa sakyanan ang usa ka langyaw nga lalaki nga siga og mata ug dunay mga patik sa lawas.
Si Jessa mibalibad ug milugnot dayon midagan palayo sa maong babaye apan sila si Jun ug Boy maoy gisunod og bunlot unya gipasakay sa sakyanan.
Niadtong higayona si Jessa daling miuli ngadto sa ilang balay ug misumbong ngadto sa ilang inahan.
Ang inahan ni Jessa daling nangita og habal-habal nga masakyan ug gigukod ang sakyanan hangtud nga kini naapsan sa Pangdan, Naga ug dihang ilang napahunong, ang babaye nangrason nga buot lang nilang tultulan sila sa bata diha sa Pangdan.
Tungod niini gipakanaog dayon ang duha ka bata hinungdan nga wala na lang kini i-report sa inahan sa mga bata ngadto sa mga polis.
Sa laing bahin, si Konsehal Concordio Mejias sa Minglanilla nagkanayon nga karong adlawa mopahigayon sila og special session alang sa fund raising sa P100,000 nga ilahang ihatag nga ganti ngadto sa mga makatudlo sa mga suspetsado nga midagit ug mipatay kang Ellah Joy.
Si Mejias midugang nga si Mayor Eduardo Selma mohatag og pinansiyal nga hinabang ngadto sa pamilya ni Ellah Joy. (BANAT NEWS)