CEBU, Philippines - Nagkagulkol na sa bilanggoan ang lima ka tawo nga nadakpan sa mga sakop sa City Anti Illegal Drug Task Force (CAIDSOTF) sa Mandaue City Police Office (MCPO) sa managlahing takna ug dapit sa maong dakbayan gumikan sa paghupot ug pagpamaligya og ginadiling drugas sa managlahing lugar ug takna sa maong dakbayan.
Si Inspector Henry Bancolita, hepe sa buhatan sa MCPO nga nahinabi sa Banat News miila sa nadakpan nga si Oscar Tuazon, Armando Manatad, Razel Canin, Nilo Marababol, ug Charlie Abellanosa.
Si Tuazon nasakmitan og Nubain, samtang si Manatad ug Canin nga taga barangay Basak sa maong dakbayan, nasakmitan usab og ubay-ubay nga mga pinutos nga shabu.
Si Abellanosa nga taga AS Fortuna sa maong dakbayan nakuhaan og lima ka linikit nga pinaugang dahon sa marijuana ug si Marababol nga taga barangay Guizo nasakmitan usab og duha ka paketeng shabu.
Silang tanan nagpahayahay na karon sa prisohan sa Mandaue City Police Office. - BANAT NEWS