Sikyu napalgang patay

CEBU, Philippines - Napalgang patay ang usa ka guwardya sulod sa gibantayan niining Mabolo National High School sa barangay Mabolo siyudad sa Sugbo kagahapon sa alas 6:00 sa buntag. Ang biktima nailhan sa kapolisan nga si Ramon Sulbano, 47, minyo, nga taga sitio Compound sa barangay Carreta siyudad sa Sugbo ug sakop sa Golden Ace Security Agency.

Sa pakisusi sa mga sakop sa Homicide Section sa Cebu City Police (CCPO) nasayran nga usa ka Robert Mongaya kaubang guwardya sa biktima mitug-an kanila nga iyang nakit-an ang biktima duol sa canteen sa nahisgutang tunghaan nga wala na maglihok.

Hinungdan nga naalarma siya ug daling nanawag sa kapolisan sa Mabolo.

Si Mongaya midugang sa pag-ingon nga ang biktima nagsagubang sa sakit nga highblood ug gani kanunay lang motaas ang pressure sa dugo niini.

Ang pamahayag ni Mongaya gisuportahan usab sa asawa sa biktima nga si Elena.

Girekomendar sa kapolisan nga ipaubos sa autopsy ang lawas sa biktima aron pagtino nga walay foul play ang kamatayon niini.  - BANAT NEWS