CEBU, Philippines - Mupahigayon og Clean-up project ang Cebu City Government isip lakang aron malikayan ang pagbaha sa panahon sa ting uwan, kini ang gibutyag sa Coastal Management Board (CMB) atol sa gipahigayon nga pulong-pulong sa Barangay Sto. Niño kagahapong adlawa.
Si Barangay Captain Pancho G. Ramirez nga nahinabi sa Banat News, nagkanayon nga lisud ipatuman ang 3 meters removal sa mga pinuy-an ug lakip na sa mga establisimento nga duol sa sapa gumikan sa kakuti ug kadugay pa sa pag-implementar niini, mi-awhag usab siya nga angayang ang mga mulopyo mismo maoy magsugod ug mag- maintain sa pagpanglimpyo sa ilang gingsakupan ug likayan na ang pagpanglabay og mga basura sa mga sapa.
Si CMB representative Arnel Alicer mibutyag nga karong Marso 19, ipahigayon ang maong proyekto sa Barangay Mabolo diin mogamit sila og backhoe aron sa pagkawot sa mga basura. Kini mao ang ika-22 nga clean-up project sa City Government. - Reina Vita Labang, Maria Ana Carmela Estenor, Jayson Comanda (BANAT NEWS)