CEBU, Philippines - Human ilusad sa lalawigan sa Sugbo ang Disaster Risk Reduction Campaign ug gitaoran og ngipon ni Gobernador Gwendolyn Garcia pinaagi sa Provincial Disaster Risk Reduction Management Council, andam na kaayo karon ang mga opisyales sa Ready Reserve Battalion sa pagpangandam sa katalagman nga moabot.
Kini human itakda sa gobernador isip maoy Batallion Commander sa 1st ready Reserve Batallion dinhi sa Sugbo ug Regional Community Defense Group Head Lt. Colonel Raymundo Bañares ang pagpirma og Memorandum of Agreement (MOA) alang sa pagpahigayon og training alang sa Community Defense Disaster Risk Reduction Management.
Matud pa ni Garcia nga apil sa maong MOA signing mao ang mga mayor sa kalungsoran ug mga barangay captain sa lalawigan sa Sugbo aron makahatag sa ilang pasalig nga andam silang molihok sa panahon sa katalagman aron sa pagsalbar sa kinabuhi ug kabtangan sa mga molupyo.
Si Bañares usab sa iyang bahin nagkanayon nga ang nahisgutan nga training gitakda nga himoon karong Pebrero 18, 2011 alang sa Community Disaster Risk Reduction Management Training.
Nunot niini si Bañares nagkanayon nga gi-andam na nila ang tanan alang sa nahisgutang kalihukan nga malakip sa pagbansay sa mga hepe sa barangay tanod.
Kahinumdoman nga bag-o lang nag-meeting sila si Bañares ug Garcia ug lakip sa nahisgutan nila mao ang pagpatukod og kampo sa reservist sa kanhi Cebu Provincial Police Office sa Sudlon, Lahug. - BANAT NEWS