CEBU, Philippines - Gitakda karong Biyernes ang pagpanumpa sa 150 ka pinili nga mga barangay tanod gikan sa 30 ka barangay sa dakbayan sa Lapulapu nga pagatawgon og Unified Task Force (UTF).
Kini human sila ipaubos sa higpit nga pagbansay bahin sa tukmang paagi sa pagbantay sa kalinaw ug kahusay sa ilang lugar.
Si Mayor Paz Radaza nga nahinabi sa Banat News miingon nga dili ordinaryo nga mga barangay tanod ang mahimong sakop sa UTF kay ang ilang tahas para sa katibuk-ang syudad ug dili kay sa usa lang ka barangay.
Matud pa niya nga ubos sa superbisyon sa kapolisan sa dakbayan ang maong mga pinili nga barangay tanod moayuda sa mga kalihukan sa kapolisan sa tibuok syudad.
Dugang pa ni Mayor Radaza nga magsul-ob og uniporme ang maong mga tanod ug kompleto kini sa kahimanan sama sa batuta, posas ug teargas
Si Radaza miingon nga higpit hinuon nga gidili sa maong mga tanod ang pagdala og bisan unsang matang sa kalibre nga armas de fuego sanglit dili man kini motrabaho og sama ka risgo nga gisagubang sa mga polis.
Gitataw ni Mayor Radaza nga ang kaakohan nga itahas sa UTF mao ang pagpahigayon og surveillance, pagdakop sa mga nakalapas sa balaod kuyog sa regular police force ug uban pa.
Si Radaza miingon nga magdawat og honorarium nga P1,500 ang matag tanod sa matag bulan gikan sa panudlanan sa syudad, ug lain usab ang dawatunon nilang honorarium gikan sa internal revenue allotment sa barangay nga ilang nadestinohan. - BANAT NEWS