Ouano ug kauban abswelto sa kaso

CEBU, Philippines - Daw naibtan og tunok si kanhi Mandaue City Mayor Alfredo “Pedong” Ouano dihang iyang nasayran nga giabsuwelto na siya sa kaso nga milungtad na og 16 ka tuig nga gipasaka sa kanhi mga kaatbang niya sa politika.

Ang mga kauban ni kanhi mayor Ouano sa maong kaso mao ang mga kanhi konsehal sa dakbayan kinsa naabsuwelto usab.

Sila mao si kanhi konsehal Pontico “Tex” Portuna, Noel, Cesar Cabahug Jr., Mark Lester Jeanjaquet, kanhi city administrator Victor Biano, city treasurer Lorna Atega, Looc barangay kapitan Raul Pokang Cabahug ug Mandaue City Councilor Cabahug.

Ang mga kihante mao ang mga oposisyong konsehal kaniadto nga si   Diosdado Suico, Demetrio Cortes Jr., ug Dedith Bercede.

Nanukad ang maong kaso dihang mipalit ang kagamhanan og luna   nga nagkantidad og P3,500 matag metro kuwadrado sa gidak-on nga 3,135 metro kuwadrado.

Ang gahin nga gibayad sa maong luna giaprobahan ni kanhi mayor Ouano human kini lig-ona sa konseho sa dakbayan.

Ang nahisgutang yuta maoy gitarokan sa Cesar Cabahug Memorial High School sa barangay Looc, nga maoy amahan ni Kapitan Pokang Cabahug.

Gipasangil sa mga oposisyon nga gipaburot ang presyo sa maong luna nga maoy ilang gibasehan sa pagpasaka og kaso ngadto sa Sandiganbayan 1st Division kinsa mao usab ang nagpakanaug sa hukom nga miabsuwelto sa mga akusado.  - BANAT NEWS