Suspek nga nangiriw og P232 mil giimbestigar

CEBU, Philippines - Upat ka tawo karon ang gipaubos sa imbestigasyon sa kapolisan sa lungsod sa Asturias tungod sa pagkawagtang sa kantidad nga P232 mil gikan sa Treasurers Office sa maong lungsod nga gisulod og wala hiilhing mga kawatan sa miaging buntag.

Sa pakighinabi sa Banat News ni SPO2 Dennis Nucos mibutyag nga ang maong imbistigasyon gihimo tungod sa katahap nga inside job ang maong kaso.

Matud pa ni Nucos nga dako og posibilidad nga inside job gyud ang maong kawat kay wala sila makakita og mga timaan nga naabli ang pultahan sa treasurer’s office nga giagian sa kawatan.

Nasayran nga niadtong Domingo sa buntag ang disbursement officer sa maong buhatan nga si Marina Pable midangop sa kapolisan ug gisumbong ang maong hitabo.

Busa mihimo dayon og lakang ang kapolisan pinaagi sa pag-inspection sa buhatan nga gikawatan ug didto nasuta nila nga walay mga timailhan nga may bahin sa buhatan nga naguba kay giagian sa kawatan.

Nasud-ong usab nila nga ang French window sa maong opisina wala sirad-i ug abli kaayo. Matud pa ni Nucos nga dihang gikuwenta ni Pable ang nahibiling kuwarta sa ilang kaha, nasuta niini nga P232 mil ang nawagtang

Ang maong kwarta para unta sa suweldo sa mga job-order worker sa maong munisipyo. (BANATNEWS)