Koreano nangulata'g polis priso
CEBU, Philippines - Gipasakaan og kasong direct assault ang usa ka Korean national nga mikulata sa usa ka polis sa sulod sa Mandaue City District Hospital (CDH) sa miaging gabii.
Ang gikiha mao si Jo Kyong Fil, 29, lumad nga taga Seoul South Korea ug kasamtangang nag-abang og balay sa Dona Rosario Village sa barangay Paknaan, dakbayan sa Mandaue.
Si PO2 Arthur Cuyos sa kapolisan sa Presinto 1 sa Centro Police Station nga nahinabi sa Banat News miingon nga gialarma sa mga molupyo sa Fatima ang maong langyaw kay nanghagis gumikan sa hilabihang kahubog.
Gani mihigda kini sa taliwala sa karsada nga maoy nakaingon sa kahasol sa mga drayber nga molabay sa maong dalan ug dili na kini maminaw sa mga molupyo nga mibadlong kaniya.
Gumikan niini ang mga molupyo midangop sa kapolisan nga gipangulohan ni PO3 Leo Batikalaw kinsa nagpatrolya niadtong tungora didto sa maong dapit.
Si PO2 Herbert Cuyos midugang nga gumikan sa kalasbag sa maong Koreano gihatod kini sa kapolisan ngadto sa MCDH kay gipa -liquor test.
Apan matud pa ni PO2 Cuyos nga dihang dad-on na unta kini sa sulod sa maong tambalanan kalit niining gipikhan sa iyang kumo si PO3 Batikalaw busa nawingig intawon ang polis ug maayong pagka-bun-oga niini agi sa kumo sa maong Koreano.
Hinungdan nga samtang nagpaabot sa husay sa iyang kaso gipakagulkol una kini sa prisohan. (BANATNEWS)
- Latest
- Trending
