Gwen mopabaha og mga proyekto sa Medellin

CEBU, Philippines - Human sa dakbayan sa Mandaue, ang lungsod na usab sa Medellin maoy buboan og proyekto ni Gobernador Gwendolyn Garcia.

 Kini human   itumbok sa gobernador nga ang lungsod sa Medellin tukoran og ubay-ubay nga mga proyekto gikan sa kagamhanan sa lalawigan sa Sugbo.

 Matud pa ni Garcia nga lakip sa pagatukoron nga proyekto mao ang unom ka mga classroom building, coastal spillway ug patrol boat alang sa kampanya sa lalawigan batok sa illegal fishing.

 Gani gimandoan dayon ni Gobernador Garcia si Provincial Engineer Eulogio Pelayre sa paghimo og plano alang sa Coastal spillway sa Barangay Poblacion sa nahisgutang lungsod.

 Samtang aprobado na usab sa gobernador ang pagpatukod og 6 ka classroom building alang sa Medellin Science and Technology   Elementary Department nga gitunol dayon niya ngadto kang Provincial Planning and Development Officer Engr. Adolfo Quiroga aron kasugdan ang pagpabarog niini.

 Gimandoan usab dayon sa gobernador si provincial environment and natural resources officer Nerces Bispo sa lalawigan sa pagpadala sa patrol boat ngadto sa Medellin alang sa kampanya batok sa illegal fishing.

 Gani daghan pa nga mga proyekto sa gobernador ang nahisgutan sa ilang tigom uban kang Medellin Mayor Ricardo Ramirez, 4th District Representative Benhur Salimbangon ug mga miyembro sa Sangguniang Bayan sa nahisgutang lungsod.

 Kahinumdoman nga kanunay nga miayuda si Gobernador Garcia sa lungsod sa Medellin sama sa paghatag og water system og pagpatukod sa tertiary level education niini. (BANATNEWS)