Hikog, 3 na sab

CEBU, Philippines - Usa ka amahan ug usa ka anak ug asawa ang naghikog sa managlahi nga lugar sa lalawigan sa Sugbo ug oras kagahapong adlawa ug sa miaging adlaw.

Sila mao si Jade Talara, 20, ulitawo, nga taga barangay Candulawan, dakbayan sa Talisay ug Germeneheldo “Erning” Donal, 28, nga taga sitio Amansiao, barangay Catuohan, lungsod sa Dalaguete, ug Joneta Arrisgado, sa barangay Pulpogan Consolacion.

Si Talara kinsa usa ka drayber sa habal-habal napalgan sa iyang inahan nga nagbitay patay sulod sa iyang lawak kagahapon sa alas 6:00 sa buntag.

Sa pakighinabi sa Banat News ni SPO1 Elmer Saladas, sa kapolisan sa Talisay, nasayran nga si Kapitan Virgilio Bacalso sa Candulawan maoy mipahibawo kanila bahin kang Talara nga naghikog.

Matud pa ni Saladas nga ila gyud mismong nasaksihan si Talara nga nagbuy-od sa katre niini nga wala nay kinabuhi samtang giasoy sa inahan nga si Dorotia nga habol maoy gigamit ni Talara sa paghikot sa iyang liog ug gigaid usab sa sagbayan sa ilang balay ang pikas tumoy niini.

Gani gisuwayan pa nila og hatod ngadto sa Talisay City District Hospital apan gideklarar kini sa mga doctor nga dead on arrival

Samtang si PO1 Jun Dave David mitug-an usab nga base sa nakuha niyang kasayoran ikatulo na kining higayon nga si Talara misuway og kutlo sa iyang kinabuhi.

Niadtong Pebrero 2, misuway usab kini og hikog apan wala madayon.

Midugang siya nga usa ka drug dependent si Talara ug ang paghikog niini resulta sa iyang pagpangluod kay wala ihatag sa iyang ginikanan ang iyang gipangayo.

Samtang si Donal didto gihapon kini magbitay patay sulod sa ilang lawak ug ang asawa niini maoy nakadeskitar niadtong Sabado sa buntag.

Matud ni Michell nga asawa ni Donal nga 4 metros nga pisi maoy gihikot sa iyang bana sa liog niini ug gigaid ang tumoy niini sa ilang sagbayan.

Ang miresponding kapolisan nakapunit og usa ka botelya sa hilo sa ilaga ug sa kilid niini, didto ang usa ka suicide note nga nagpahibawo sa iyang asawa nga mawala na siya niining kalibutan sa mga buhi.

Base sa inisyal nga impormasyon gikan sa kapolisan nga si Donal maoy gitumbok nga primary suspect sa nahitabong pagpanunggab ug panigbas sa tulo niya ka mga silingan niadtong Pebrero 4 didto sa ilang lugar.

Samtang si Arrisgado didto gihapon hipalgi sa iyang bana sa sulod sa ilang lawak nga wala nay kinabuhi human higti og pisi ang liog niini ug gigaid gihapon sa sagbayan   sa balay ang pikas tumoy.

Nasayran gikan sa kapolisan nga ang bana nga si Dionesio Ruiz Arrisgado mibutyag kanila nga ang iyang asawa nag-antos sa sakit nga nerbyus ug gituohan nga mao kini hinungdan sa iyang pagpakamatay.   (BANAT NEWS)