Taga Lapulapu gi-seminar bahin sa basura

CEBU, Philippines - Gipaubos sa seminar ang mga barangay opisyal sa dakbayan sa Lapulapu alang sa hugtanong pagpatuman sa Republic Act 9003 nga mao ang Solid Waste Management Act of 2001.

Si City Administrator Teodolo Ybanez sa maong dakbayan maoy nangulo sa maong seminar kay siya maoy gitahasan ni Mayor Paz Radaza sa pagpatuman sa balaod bahin sa tukmang paglabay sa mga basura sa dakbayan.

Si Association of barangay Council Presidente (ABC) Leo Mercado kinsa maoy nangulo sa mga barangay opisyal sa pagtambong sa maong seminar nga nahinabi sa Banat News mipadayag usab sa kamahinungdanon sa maong seminar alang sa mga barangay opisyal.

Matud pa niya nga ang ilang barangay diin siya maoy kapitan, maoy mag-una sa pagpatuman sa tukmang paglabay sa basura nga dili na magpasad sa kadalanan.

Gitataw niya nga gihingusgan sa administrasyon ni Mayor Radaza ang pagbahig sa mga basura sa madunot ug dili madunot sa dili pa ilabay gikan sa mga panimalay.

Sa maong seminar gisugyot nga ang mga papel, karton, sagbot o biya sa mga utanon ug uban pa, ilain og sudlanan ug ilain usab ang mga basura nga sama sa plastic, botelya ug uban nga dili madunot sa dili pa kini ilabay sa basurahan.

Si Mayor Radaza sa press conference nga gipahigayon mipadayag nga ang kagamhanan sa dakbayan hingpit na nga nakamugna og Material Recovery Facilities diin ang mga basura nga malata ug dili malata , gi-recycle alang sa mahinungdanong kagamitan niini. Matud pa ni Radaza   nga gumikan sa gitukod nga MRF, ang kanhi dumping site sa sitio Soong sa barangay Mactan nahimo na karong utanonan kay pulos na basurang malata ang gitapok sa maong basurahan. (BANAT NEWS)