Kanhi polis tiklo sa buy - bust

CEBU, Philippines - Nagtingkagol karun ang kanhi polis human nasikop sa operatiba sa Provincial Intelligence Branch (PIB) pinaagi sa buy-bust operation sa miaging gabii sa barangay Antipolo lungsod sa Medellin.

Ang nasikop mao si kanhi PO2 Ruby Jess Cabucos, kinsa nakuhaan og pipila ka drug paraphernalia, armas ug pipila ka mga buhing bala samtang ang kuyog niini nga nasikop mao si Rodrigo Loreto nga molupyo sa maong lugar.

Nasayran nga mipahigayon og buy-bust operation ang mga operatiba diin si Loreto mitunol sa poseur buyer sa gituohang ginadiling drugas nga dili palang dugay nga gihatod ni Cabucos.

Sa diha nga natunol na kini dali usab nga giposasan sa kapolisan si Loreto samtang si Cabucos nga nakalakaw na, dali usab nilang gisundan ug didto ila gayud nga nasikop sa barangay Curva sa nahisgutang lungsod.

Nakuha gikan sa mga suspetsado ang unom ka paketeng gituohang shabu nga gibana-bana nga nagkantidad og P3 mil ngadto P5 mil, upat ka disposable lighters, 4 ka cellular phones, kalibre .45 colt government model nga paltik nga pistola, duha ka magazine sa kalibre .45 nga adunay pito ka buhing bala, laing 47 ka buhing bala sa kalibre .45, kwarta nga nagkantidad og kapin P24 mil ug Isuzu Crosswind (SUV) nga adunay plakang ZNK-842.

Matud pa ni PO3 Reynaldo Solante nga nangulo sa maong operasyon nga anaa sa level 2 drug pusher si Cabucos diin makadispatsar kini og 200 gramos kada semana diin nagkantidad og 2.5 milyonis.

Midugang usab si Solante nga dugay na usab nila nga gipaubos sa surveillance si Cabucos gani niadto pang miaging tuig nila kini gisundan.

“Lisod dakpon kay maayo motago pero gisuwayan namo og buy-bust ang usa sa iyang tagakanan didto namo maabti,” pasabot pa ni Solante.

Butyag usab ni Solante nga na-dismiss sa serbisyo si Cabucos human niya gigamit ang iyang service firearm nga dili in-line sa iyang trabaho pipila na ka tuig ang milabay.

Samtang sa wala pa madestino si Cabucos sa CPPO nadestino kini siya sa Regional Mobile Group.

Nasayran usab nga si Cabucos ang gipasanginlang kauban ni kanhi barangay kapitan Marianito Yaun nga namatay sa nahitabong shootout sa barangay Pulang bato Talamban niadtong Nobiyembre sa miaging tuig.

Kasamtangan karun nga gitingkagol sa Consolacion Police Station ang duruha samtang nagpaabot sa tukmang kaso nga ipasaka batok kanila. (FREEMAN)