Pamilya sa nalumos gitabangan

CEBU, Philippines - Personal nga gitunol sa kagamhanan sa probinsya sa Sugbo ang financial assistance ngadto sa inahan sa bata nga nalumos didto sa Carcar niadtong bulan sa Disyembre sa miaging tuig. Si Mardine Amor ang inahan ni Archie Amor, 9, maoy personal nga midawat sa P5 mil nga tseke nga hinabang sa buhatan ni Gobernador Gwen Garcia pinaagi sa Chief of Staff sa gobernador nga si Elizabeth Francia inabagan ni Wilson Ramos sa Provincial Social Welfare Development Office (PSWD).

Nasayran nga ang namatay nga bata gikan pa sa eskuylahan unya mihapit sa sapa ug naligo uban sa kauban niyang tinun-an sa grade 2 sa Can-asuhan Elementary School apan nalumos kini ug namatay tungod sa kalawom sa sapa.

Ang inahan nga si Mardine Armor naghilak nga mitug-an sa Sugbo TV news team kun unsa kadako sa iyang pagbangutan gumikan sa pagkamatay sa usa sa iyang anak.

Si Mardine mipaabot sa iyang dakung pasalamat ngadto sa gobernador sa paghatag niini sa hinabang financial kay ang maong kantidad daku na kaayo og matabang ilabi na sa ilang pang-adlaw-adlaw nga panginahanglan. (BANAT NEWS)