Mandaue ug Lapulapu mapapas

CEBU, Philippines - Mapapas ang dakbayan sa Mandaue ug dakbayan sa Lapulapu kun padayong magpabaya ang katawhan sa pagpanalipod sa kalikopan.Kini maoy pasidaan sa mga eksperto sa kalikopan atol sa seminar nga gipahigayon didto sa dakbayan sa Mandaue nga gipasiugdahan ni Provincial Board Member Thadeo Ouano sa miaging adlaw.

Usa sa mga mamumulong sa maong seminar nga si Bebeth Guzon, presidential assistant for climate change miingon nga ang Mandaue ug Lapulapu may posibilidad nga malubong sa tubig nga mugna sa kusog nga ulan ilabi na kun mahitabo nga taob ang dagat.

Si Guzon miingon nga kini maoy ilang napanglantawan sa maong mga dapit base sa mga pagtuon nga ilang gihimo nga mahitabo dinhi sa Sugbo sa tuig 2068 ngadto sa 2096 kun magpadayon ang katawhan nga dili magpakabana sa pag-atiman sa ilang palibot.

Matud pa ni Guzon nga ang nasinating hilabihang kainit karon sa kalibotan moresulta usab kini sa pagbunok sa kusog nga ulan nga maoy nasinatian sa Sugbo niadtong Enero 25 niining tuiga nga nakapalunop ug nakapabaha sa pipila ka mga dapit niini.

Gitataw ni Guzon nga ang gihingusgan nga pagpatuman sa paghipos sa mga basura ug ang pagpanglimpiyo sa kasapaan nga kasamtangang gihimo sa mga lokal nga kagamhanan maisip nga temporaryo lamang nga paagi sa pagsulbad sa maong suliran.

Si Environmental Lawyer Antonio Opposa kinsa usa usab sa mga dinapit uban sa mga environmental officer sa kalungsoran ug lalawigan midason usab sa pamahayag ni Guzon ug nagkanayon nga bisan ang pagpananom og kahoy dili maoy tino nga makasulbad sa kainit sa panahon   tungod kay mas hinay ang pagpananom sa kahoy kay sa pagpanemento sa nagkalainlaing lugar nga maoy labing makapainit sa palibot kay dili naman makahunob ang tubig ngadto sa ilawom sa yuta.

Gipasabot ni Opposa nga kun buot hunahunaon dili na trabaho sa tawo ang pagpananom og kahoy tungod kay iya kini sa kalanggaman nga giguba usab sa katawhan pinaagi sa pagpamutol niini.

Dugang pa ni Opposa nga ang daghang tubig nga mohugpa sa yuta nga mugna sa kusog nga ulan mangita gayud og kabuhagayan nga maoy hinungdan nga moawas kini ngadto sa kabalayan nga nahimutang sa lupa nga bahin.

Gisugyot ni Opposa ang labing maayong pagahimoon sa mga opisyal sa lokal nga kagamhanan niining panahona mao ang pagkawot sa yuta nga kapundohan sa tubig aron nga kun moawas ang kasapaan adto mobuhagay ang inawas sa gilungagang yuta nga maoy kapundohan niini. (BANAT NEWS)