CEBU, Philippines - Ang paryente sa kanhi city veterinarian sa dakbayan sa Talisay miawhag nga dili gamitong propaganda sa dautang tumong ang kamatayon ni Dr. Galileo Larawan.
Si Eve Larawan bayaw sa mitaliwan nga si Dr. Larawan nga nahinabi sa Banat News nagkanayon nga kombinsido silang atake sa kasing-kasing ang hinungdan sa kamatayon sa iyang bayaw kini base usab sa resulta sa autopsy sa patay’ng lawas niini.
Kahinumdoman nga niining ulahi lang ang city veterinarian sa dakbayan sa Mandaue nakadawat og hulga nga mensahe sa text nga nagkanayon “daku na mi alkanse, basin gusto ka mosunod veterinarian Talisay, gamay na lang panahon tepe ka”.
Matud ni Eve nga ang ilang hangyo nga dili na lang unta himuong propaganda ang kamatayon sa iyang bayaw tungod kay gihimo kining panag-ingnan sa pagpanghulga.
“Dili na lang unta nila iapil si doktor anang ilahang isyu ron, kung unsay ilahang problema i-spare na lang unta nila si Dr. Larawan”.
Matud ni Eve nga dihang buhi pa si Dr. Larawan mosulti gyud kini ngadto kanila kung ugaling duna kini mga problema lakip na sa kabahin sa trabaho niini.
Mokabat sa napulo ka tuig nga nagserbisyo isip city veterinarian sa Talisay si Dr. Larawan apan wala kini mosulti o maghisgot ngadto kanila nga adunay nanghulga sa kinabuhi niini apan hinuon mibutyag kanila kaniadto ang mitaliwan nga city veterinarian nga adunay nakalalis niini nga mga supplier tungod sa pagpatuman niya sa mga pamaagi diha sa ihawan sa siyudad.
Si Dr. Larawan napalgan na lang kining wala nay kinabuhi sulod sa iyang balay sa barangay Lagtang niadtong milabay’ng tuig.
Ang hepe sa Talisay City Police Station nga si Superintendent Henry Biñas nga nahinabi sa Banat News nagkanayon nga kombinsido sila nga atake sa kasing-kasing ang namatyan ni Dr. Larawan kini base sa resulta sa autopsy.
Matud niya nga ang nahitabo ni Dr. Larawan gigamit lang kini o gihimong pasangil sa tawo nga nanghulga sa city veterinarian sa Mandaue aron makamugna kini og dakung kabalaka ug kahadlok sa biktima.
Ang hepe nagkanayon usab nga posibleng adunay dakung kasuko ngadto sa city veterinarian sa Mandaue ang nagpadala sa hulga nga mensahe sa text.
Apan matud usab ni Biñas nga susihon niya ang maong insidente ug magpadala siya og imbestigador aron moayuda sa kapolisan sa Mandaue nga mopahigayon og imbestigasyon niini. (BANAT NEWS)