Pito ka tawo naaktuhang nagturok og Nubain sa Day-as priso

CEBU, Philippines - Pito ka mga gipasanginlang ‘adik’ ang naputlan sa ilang kalipay human masakpi sa akto nga nagtupok na og Nubain sulod sa usa ka drug den pasado ala una sa hapon kagahapon sa sitio Feather barangay Day-as ning dakbayan.

Ang mga nasikop mao sila si Aristeo Tabar Artajo, 27, Nestor Laguna Zamora, 42, Reni Cabuag Torrecampo, 32, Sandy Acosta Ejares, 31, Simeon Abella Veloso Jr, 43, Royd Diez Bacalla, 22 ug Adrian Chavez Badal, 24.

Si Theft and Robbery Section (TRS), Chief Inspector Bonifacio Garciano mibutyag nga nakadawat sila og impormasyon kalabot sa drug den sa maong lugar.

Hinungdan nga ila kini nga gisusi og didto ilang nakit-an ang usa ka payag ug sa diha nga ila kini nga gisusi naaktuhan nila ang pito nga nagtusok og syringe sa ilang braso.

Nakuha gikan sa ilang mga kamot mao ang 20 ka syringe ug siyam ka ampules sa gituohang Nubain nga karon gikunsiderar nga ‘dangerous drugs’ sa RA 9165.

Gisusi na usab sa kapolisan kun si kinsa ang tag-iya sa maong payag nga giingong paabangan og P5 sa mga drug addict nga mogamit og ilegal nga drugas.

Samtang sa laing bahin, sa miaging gabii, pasado alas 7 nasikop usab ang usa ka lalaki human makuha-i og usa ka paketeng gidudahang shabu sa Anti-Carnapping checkpoint operation ang TRS sa barangay Pasil ning dakbayan.

Ang nasikop mao si Joel Lanit Bagol, 31, molupyo sa maong lugar diin nakuha sa iyang mga kamot ang usa ka dakong pakete sa gituohang shabu samtang kini luwan sa Honda XRM nga adunay plakang 1353GF.

Giingong sa dihang gi-ablihan ni Bagol ang U-box sa motor giingong nakit-an sa kapolisan ang gituohang shabu nga gibana-bana nga nagkantidad kini og di mominos P30 mil.

Ang gituohang shabu giingong bag-ohay pa nga gipalit ni Bagol, apan sutaon pa usab sa kapolisan sa TRS kun si kinsa ang supplier niini. (BANAT NEWS)