CEBU, Philippines - Usa ka polis ang nabiktima sa tulo ka batan-ong armadong tulisan sulod sa usa ka jeepney diha sa barangay Subangdaku, dakbayan sa Mandaue alas-3 pasado ang takna sa miaging kaadlawon apan gidemalas ang tulo kay sila nadakpan.
Ang nadakpan mao sila si Mark Bryan Yosores, 20, taga sitio Calinaw sa barangay Carreta, dakbayan sa Sugbo; Johnrey Paarita, 19, taga sitio Lahing-Lahing, barangay Mabolo, kinsa nakuhaan og pugakhang ug usa ka minor de edad nga lalaki nga ilang kauban.
Si PO3 Antolin Montecalvo sa kapolisan sa Presinto 2 sa Subangdaku Police Station miingon nga gitulis sa tulo mao si PO1 Reagan Perella, 34, taga barangay Jugan sa lungsod sa Consolacion ug nadestino sa Samboan Police Station.
Matud pa ni Montecalvo nga paingon sa Samboan si Perella luwan sa PUJ gikan sa North Bus Terminal nga puno usab sa mga pasahero apan giingong pag-abot sa may Subangdaku ang tulo mideklarar og tulis.
Si Montecalvo miingon nga ang mga tulisan mipahiluna diha sa luyo ug ang usa diha sa luyo sa drayber.
Si Perella wala dayon mo-react ug apil sa uban pang mga pasahero nga gihimulbolan sa ilang mga kwarta, cellphone, pitaka ug uban pa. Si Perella nakuhaan gawas sa iyang cellphone nakuha usab iyang pitakang adunay sulod nga P2,000 ug PNP ID. Human sa maong pagpanulis ang tulo ka tulisan ang nagdali sa pagpanganaug apan ang usa niini dali nga nagunitan ni Perella nga maoy hinungdan sa nahitabong paglinayogay.
Ang drayber nga gikuwayan uban sa mga pasahero ang kalit lang mipabulhot sa pagpadagan hinungdan sa pagkahagbong ni Perella ug sa gikalayog niining tulisan.
Nailog ni Perella ang kalibre .38 nga gidala sa tulisan kinsa misutoy sa pagdagan ug nahitabo ang ginukdanay sa maong lugar. Sumala pa nga usa sa mga tulisan ang mipusil kang Perella apan wala makaigo.
Si PO1 Perella midangop dayon sa Subangdaku police station ug sa gihimong follow-up operation nasikop ang tulo ug positibong giila sa maong polis. (BANAT NEWS)