Balay gidaro sa trak

CEBU, Philippines - Nalandig sa tambalanan ang usa ka 40-anyos nga babaye human ang ilang balay gidaro sa dump truck nga miungot ang manobela kagahapon sa ala-una sa kaadlawon diha sa barangay Uling, dakbayan sa Naga.

Ang biktima mao si Vilma Rosalita, residente sa maong dapit nakaangkon og mga kadaot sa lawas daling gidala ngadto sa South General Hospital apan gibalhin kini ngadto sa Cebu Doctors Hospital sa dakbayan sa Sugbo.

Ang drayber sa dump truck nga nagtangag sa plakang GSL-301 giila sa mga polis nga si Romeo Bahilot, 45, taga barangay Luray I Poblacion, dakbayan sa Toledo ug nagtingkagol karon sa Naga City detention cell.

Si SPO4 Tito Swan, duty desk officer sa Naga City Police Station nga nahinabi sa Banat News kagahapon nagkanayon nga si Bahilot nagbiyahe gikan sa Toledo paingon unta ngadto sa dakbayan sa Sugbo.

Apan pag-abot diha sa kurbadahong lugar sa barangay Uling miungot ang manobela sa truck hinungdan nga wala na kini makontrolar ug milahos ang sakyanan ngadto sa semi-concrete nga balay ni Rosalita nga nahimutang diha sa daplin sa karsada.

Niadtong higayona ang biktima ug ang iyang bana diha sa sala sa ilang balay nangatulog.

Matud ni Swan nga mao na lay namatngunan sa magtiayon nga nabungkag na ang ubang dapat sa ilang balay dapit sa sala ug didto kini mitugpa sa biktima.

Hinuon ang dump truck wala molahos og daro sa tibuok balay tungod kay natamakan man dayon sa drayber ang preno niini. Si Bahilot mikuyog og hatud ni Rosalita ngadto sa South General Hospital ug didto na sa maong hospital siya gisikop nila ni PO1 Diosdado Paunil Jr. ug PO1 Mike Villarmia.

Sa oras sa pagsuwat niining balita matud ni Swan nga ang truck wala pa maugkat ug naghuwat usab sila sa mga paryente sa biktima nga moanha sa ilang buhatan aron moduso og pormal nga reklamo batok ni Bahilot. (BANAT NEWS)