CEBU, Philippines - Usa ka ginang ang giingong giatake sa sakit sa kasing-kasing tungod sa tumang kaguol nga i-demolish na ang ilang panimalay nga naa sa daplin sa mga sapa sa dakbayan sa Mandaue.
Sa report sa TV Patrol Central Visayas kagahapon, usa ka Vivencia Lapa, 69, sa Mahiga Creek ang namatay.
Adunay 119 ka pamilyang gikatakdang papahawaon tungod kay nagpuyo na lapas sa 3-meter easement sa Mahiga Creek sa barangay Subangdaku sa dakbayan sa Mandaue gikan sa maong lugar.
Nunot usab kini sa giluwatan nga pahibalo sa buhatan sa Housing and Urban Development Office (HUDO) niadtong miaging adlaw human usab sa pakisusi nga ilang gihimo tungod sa nasinati nga pagbaha niadtong milabay’ng semana.
Sa sayo pa, si Mayor Jonas Cortes nakigtigom sa mga barangay ug mimandong pahawanan gikan sa mga balay ang mga sapa ug mga kanal tungod sa kalit nga paglunop sa tibuok siyudad niadtong Enero 25 niining tuiga.
Sa maong pakisusi nga gihimo sa HUDO maoy nasuta ang mokabat sa 2,380 ka mga panimalay nga nahimutang gyud sa taliwala sa sapa o mga creek sa dakbayan o sa kilid sa mga esteros nga gikonsiderar sa Republic Act 7279 kon Urban Development and Housing Act (UDHA) nga dugay nga gipatuman sa nasudnong kagamhanan.
Nasuta usab nga posibleng maigo sa demolisyon ang barangay hall sa Mantuyong ug Presinto 5 sa barangay Opao nga nabutang usab sa agianan sa tubig baha. (BANAT NEWS)