Quisumbing misuporta sa lakang ni Gwen

CEBU, Philippines - Gisuportahan ni 6th district Congressman Gabriel Luis Luigi Quisumbing ang pagpatambong ni Gobernador Gwendolyn Garcia sa mga mayor sa Metro Cebu Area sa meting sa Metro Cebu Development Council aron hisgutan ug planohan ang pagsulbad sa mga suliran nga nasinati sa mga dakbayan ug kalungsuran sa Metro Cebu sa panahon sa ting-uwan.

Sumala pa ni Quisumbing sa interview sa DyRF nga panahon na karon nga tukion sa mga opisyales ang problema sa Metro Cebu ilabina sa trapiko ug baha.

Kini tungod kay dugay na ang maong problema ug wala pa gyud kini masulbad, matud pa niya.

Sumala pa ni Quisumbing nga dili masulbad ang maong problema kun dili magkahiusa ang tanang mga local government unit gikan sa dakbayan sa Danao sa amihanan hangtud na sa lungsod sa Carcar sa habagatang bahin sa lalawigan sa Sugbo.

Matud pa ni Quisumbing nga makasagmuyo kaayo alang sa mga investor nga makita sa television ang problema sa Sugbo nga wala pa gyud masulbad.

Dugang pa ni Quisumbing nga maayo kaayo nga gipatawag sa gobernador ang mga mayor sa tigum sa MCDC aron magkahiusa sila sa paghimo og plano sa dali nga kasulbaran sa problema sa baha ilabina niining panahon nga ting-uwan. (BANAT NEWS)