CEBU, Philippines - Patay ang usa ka sakop sa Barangay Intelligence Network (BIN) sa Cebu City Police Office (CCPO) human kini dunggaba sa gidudahang tulisan nga iyang gidakop human tulisa ang usa ka pasahero sa PUJ kagahapon sa alas-9:00 sa buntag sa atubangan sa Everest Shoe sa dalan Colon sa barangay Sto. Niño, siyudad sa Sugbu.
Ang biktima mao si Alberto Garciano, 52, nagapuyo sa M.J Cuenco Avenue, ning siyudad sa Sugbo kinsa nakaangkon og samad dinunggaban sa walang bahin sa iyang dughan.
Sumala nila ni SPO4 Alex Dacua, PO2 Jodan Batucan, PO2 Edario Manatad ug PO2 Julius Mabunay nga gikang naghatud sa iyang anak ang biktima sa City Central School ug misakay kini'g PUJ paingon sa Colon dihang gikasakay niya ang tulisan nga bag-o lang nanulis sa pasahero sa PUJ.
Pag-abot sa Colon mikanaog ang suspek ug gisundan sa biktima kay iya na untang dakpon dihang gihansakan ang iyang dughan sa kutsilyo niini nga maoy hinungdan sa hinanali niyang kamatayon.
Samtang napusilan patay usab ang usa ka trabahante sa Market Operation Division sa Cebu City Hall sa wala hiilhing tawo samtang natulog ang biktima ilawom sa Travellers Inn sa dalan Manalili ug El Felibusterismo sa barangay Ermita ning siyudad.
Ang biktima mao si Reneboy Sanchez, 24, taga dalan D. Jakosalem sa barangay Sto. Niño.
Si SPO1 Jay Yballe sa Homicide Section nga nahinabi sa Banat News mitug-an nga nahinanok pag-ayo ang biktima dihang gitirohan ang ulo niini sa armas de fuego nga maoy hinungdan sa iyang hinanaling kamatayon.
Gipangita pa sa kapolisan ang mga killer sa duha ka krimen. (BANAT NEWS)