Korapsyon sa AFP ugkaton gyud - Quisumbing
CEBU, Philippines - Si 6th District Congressman Gabriel Luis R. Quisumbing miawhag sa kongreso sa pag-imbestigar sa tanang mga anomaliya nga gihimo sa mga dagkong opisyales sa Armed Forces of the Philippines (AFP).
Kini pinaagi sa pagduso sa House Resolution No. 910 nga nag-awhag sa House Committee for National Defense and Security (HCNDS) nga mohimo og inquiry sa nanggawas nga alegasyon kabahin sa mga iregularidad sa budget and financial system sa AFP.
Si Rep. Quisumbing, kinsa maoy vice-chairperson sa HCNDS nagkanayon nga angayan lamang nga ugkaton ang gibulgar ni Ms. Heidi Mendoza, ang nagkupot sa budget sa AFP, nga matud pa may nawagtang nga P270 milyones gikan sa ayuda sa United Nations nganhi sa nasud.
Kini agi og sumpay sa alegasyon ni Navy Lt. Gadian nga may anomaliya usab sa gipahigayong Balikatan exercise dinhi sa nasud niadtong tuig 2007.
“Ms. Heidi Mendoza, in her sworn statement at a congressional hearing, disclosed that her audit revealed a missing amount of P270 million from AFP funds representing reimbursements from the United Nations. Further, in 2009 Navy Lt. Nancy Gadian revealed to the public that out of the P46 million provided by the Americans for the 2007 Balikatan war games, only P2.3 million was released to Filipino troops” sigun pa ni Quisumbing.
Miingon si Quisumbing nga ang Committee on National Defense and Security mahimong mopahigayon og dinaliang imbestigasyon sa mga anomaliya sa mga heneral sa armadong kusog sa nasud aron makurehian ang sistima karon sa AFP.
Iyang gitataw nga sa pagkakaron ang gipadagan nga sestima sa AFP haguka gihapon kaayo nga masudlan lang gihapon og kurapsyon pinaagi sa pagkonberter sa pundo sa militar gikan sa lihitimong katuyoan ngadto na sa bulsa sa mga opisyales niini.
Sa kasamtangan, ang nasudnong kagamhanan mipugong una sa pagpagawas sa P8.6 billion nga budget sa AFP nga kabahin sa P68.85 billion nga gahin sa Department of National Defense (DND) alang sa tanang mga personnel services allotment ug nag-representar sa savings sa mga nabakanting position sa uniformed and non-uniformed personnel sa AFP. (BANAT NEWS)
- Latest
- Trending
