German nagdala'g 2 bata

CEBU, Philippines - Usa ka German ang gisikop sa mga sakop sa National Bureau of Investigation-7 human niini gidala ang duha ka menor de edad nga mga babaye niadtong Miyerkules sa hapon diha sa usa ka motel sa dakbayan sa Talisay.

Ang suspetsado mao si Thomas Michael Ruhland, 38, temporaryong nagpuyo diha sa Sun Valley, dakbayan sa Sugbo.

Ang nahisgutang mga menor na-rescue sa gipahigayong operasyon sa mga sakop sa NBI-7 human ang amahan sa usa sa mga biktima nangayo og panabang.

Si Fiscal Floralil Albert sa Talisay City Prosecutor’s Office sa pakighinabi niini sa Banat News kagahapon mibutyag nga giingong ang kanhi uyab ni Ruhland higala sa duha ka mga bata hinungdan nga ang nahisgutang langyaw nakaila sa duha. Ang duha sumala pang Albert gidala ni Ruhland diha sa usa ka motel sa dakbayan sa Talisay ug giingong gikuhaan og hulagway nga walay mga sapot. Ang usa sa mga biktima mipasangil usab ngadto kang Ruhland nga gi-“sexually abused” siya niini. Usa sa mga amahan sa duha ka bata maoy midangop sa NBI human mahibaw-ing gidala ang iyang anak ni Ruhland.

Si Albert miingon nga nangangkon si Ruhland nga ang mga bata wala motug-an sa tinuoray nilang edad sanglit ang gitug-an nila kaniya dili na sila menor de edad ug misalig lang usab siya sa gisulti sa mga bata hinungdan nga wala na kini mangita pa og birth certificate.

Matud usab ni Albert nga ang German nagkanayon nga ang pagpanguha og hulagway usa lang niya ka “hobby” o kalingawan.

Si Ruhland nag-atubang og kasong two-counts sa kalapasan sa Anti Trafficking Law, two-counts sa kalapasan sa Akta Republika 7610 kon “an act providing for stronger deterrence and special protection against child abuse, exploitation and discrimination, and for other purposes” ug two counts sa kalapasan sa Akta Republika 9775 kon “an act defining the crime of child pornography, prescribing penalties therefore and for other purposes”.

Kagahapon sa hapon gipaubos sa inquest proceedings ang kaso batok kang Ruhland, ang suspek sumala pang Albert gihatagan og pito ka adlaw nga makaduso sa iyang counter affidavit samtang gitanggong kini sa NBI. (BANAT NEWS)