Mga guwardiya sa AEH tak-om ang baba

CEBU, Philippines - Napakyas ang kapolisan sa dakbayan sa Talisay pagkuha og kasayoran gikan sa duha ka guwardiya nga nakasaksi sa kamatayon sa headguard sa Alfa Executive Homes (AEH) sa barangay Lawaan III, dakbayan sa Talisay nga gipatay niadtong Decembre 2010.

Mao kini gibutyag ni Insp. Hugo Rio Ipong sa Talisay City Police Office sa Banat News kinsa nagkanayon nga ilang giimbitar sa miaging adlaw sila si Jimuel Tavera ug Rodolfo Briones, pulos tag 27 anyos, taga Lawaan ug guwardiya sa AEH sa barangay Lawaan III.

Apan matud pa ni Ipong nga gisukit nila ang duha ka guwardiya kay giingong nakasaksi kini dihang gipusil si Rolly Rodrigo, headguard sa AEH niadtong Decembre 8, 2010 sa sulod sa nahisgutang subdivision.

Ang tuyo sa kapolisan nga masayran kinsay nagpatay kang Rodrigo ug kinsa usab ang utok niini.

Nasayran nga sa wala pa patya si Rodrigo giingong gikaaway niini ang pipila ka mga molupyo sa nahisgutang subdivision.

Padayon pa ang kapolisan sa pagpangapkap og dugang ebidensya aron masayran kinsay mipatay kang Rodrigo. (BANAT NEWS)