CEBU, Philippines - Mikabat sa P30 mil kapin ang nasakiyo sa nagbinugtong tulisan nga mitulis sa usa ka lola nga Aleman didto sa barangay Guiwang, lungsod sa Alcoy sa miaging gabii.
Ang biktima mao si Brigette Parker, 68, biyuda, German national nga taga Guiwang , Dalaguete.
Matud pa sa biktima nga nahinanok siya pagkatulog sulod sa iyang lawak dihang misulod ang usa ka tawo nga nagbangot sa baba ug nawong ug napugwat siya dihang gihandosan na og kutsilyo ang iyang liog.
Unya aron nga dili siya makasinggit, gibaatan og masking tape ang iyang baba ug gigapos pa gyud ang iyang mga kamot.
Dayon gikuha ang iyang P6 mil nga cash ug ang iyang kuwentas nga bulawan nga balor og P25 mil.
Human makuha sa tulisan ang maong mga butang mibiya dayon kini sa maong lugar ug ang biktima nay mitangtang sa masking tape sa iyang baba human kini makahubad sa pisi nga gigapos kaniya.
Nagtibi ang biktima nga misumbong sa kapolisan, kinsa dali usab kaayong nakalihok pagpangita sa tulisan. (BANAT NEWS)