CEBU, Philippines - Mikapin sa $7 mil Australian dollar (AUD) ang kantidad sa kwarta, alahas ug ubang mga butang nga nasakiyo sa tulo ka mga babaye gikan sa usa ka Australian national didto sa sitio Ilang-ilang, barangay Lagtang, dakbayan sa Talisay sa miaging Martes sa hapon.
Ang biktima mao si John Edward Nielsen, hingkod , kinsa temporaryong nagpuyo sa nahisgutang sitio uban sa iyang uyab nga si Claire.
Ang suspetsado mao si Patricia Balakat, hingkod, giingong taga barangay Tanke, sa maong dakbayan.
Nailhan kini pinaagi sa resume nga iyang gisumiter ngadto kang Nielsen.
Si Balakat adunay kuyog nga laing duha ka wala hiilhing mga babaye kinsa giingong ka kunsabo niya.
Nadala sa maong mga babaye ang usa ka coded nga brief case nga adunay sulod nga $5,300 AUD, tulo ka diamond ladies ring nga kolor itom, puwa ug brown nga nagkantidad tanan og $2,000 AUD, usa ka silver nga ballpen $50 AUD, usa ka check book, usa ka solid round silver belt decoration nga nagkantidad og $100 AUD, mga yawe, pocket watch, $400 AUD mga importanteng dokumento ug uban pang mga butang.
Base sa imbestigasyon sa kapolisan nasayran nga sa milabay’ng unom ka buwan, usa ka wala hiilhing babaye ang miduol kang Nielsen ug nanghangyo nga tabangan ang iyang anak nga makabaton og uyab nga Australiano.
Si Nielsen mibutyag ngadto sa mga polis nga iyang giingnan ang maong babaye nga ipadala ngadto sa iyang gipuy-an ang anak niini aron makuhaan og hulagway.
Niadtong Domingo, ang nahisgutang wala hiilhing babaye mitungha pag-usab ug mipahibawo kang Nielsen nga moanha siya ug ang iyang anak nga si Patricia sa balay ni Nielsen aron magpakuha og hulagway.
Niadtong Lunes sa hapon napahigayon ang photo shoots diin si Patricia gikuhaan og hulagway ni Nielsen.
Samtang nag-photo shoot ang nahisgutan kunohay nga dalaga, ang inahan ni Patricia mihilom usab pagsulod sa kwarto sa biktima ug gidala ang nahisgutang brief case.
Si Nielsen mipasangil nga adunay laing babayeng kauban si Patricia ug kunohay inahan niini nga naghuwat sa gawas sa balay. Nadiskobrehan na lang sa biktima nga wala na ang iyang brief case dihang nakalakaw na ang nahisgutang tulo ka mga babaye. (BANAT NEWS)