Pistola gikawat

CEBU, Philippines - Nahanaw ang kalibre .45 nga pistola, kuwarta ug mga mahinungdanong butang sa usa ka negosyante human lungkaba ang iyang sakyanan didto sa barangay San Vicente, lungsod sa Liloan sa miaging buntag.

Ang biktima mao si Avelino Alavenez, 44 , minyo, nga taga San Vicente sa lungsod sa Liloan kansang negosyo gipadagan sa dakbayan sa Mandaue.

Si SPO1 Antolin Montecalvo sa kapolisan sa Presinto 2 sa Subangdaku Police Station sa dakbayan sa Mandaue nga nahinabi sa Banat News miingon nga namahaw ang biktima kuyog sa iyang pamilya sa usa ka fast food sa reclamation area sa maong dakbayan diin giparking usab niya ang iyang sakyanan sa atubangan niini.

Matud pa sa biktima nga wala silay kalibotan nga samtang sila nangaon, gipusposan sa kawatan ang bildo sa tuong pultahan sa iyang sakyanan diin didto kini moagi ug gisakiyo ang iyang pistola , ug mga bala nga gisulod sa clutch bag kauban sa uban pang mga butang.

Gawas sa pistola sulod sa clutch bag may salapi pa nga wala na makuwenta ang nadala sa kawatan ug mao kini gipangita karon sa kapolisan sa Mandaue.   (BANAT NEWS)