Mitulis, mipatay sa ginang napusilan kay misukol

CEBU, Philippines - Ang gidudahang mitulis ug mipusil patay sa usa ka ginang ang napusilan dihang misulay unta og sukol dihang gidakop sa mga polis sa hot pursuit operation nga gihimo sa miaging gabii sa barangay Gun-ob, dakbayan sa Lapulapu.

Ang nadakpan ug napusilan mao si Wilson Penaranda, 20, nga taga Gun-ob sa maong dakbayan kinsa suspetsado sa pagtulis ug pagpusil patay kang Maria Luisa Galapin, 54, nga taga barangay Bankal sa maong dakbayan.

    Si Penaranda gikatahong mibutyag nga ang kauban niya sa pagtulis sa biktima mao si Reynante Sumampong nga giingong lumad nga taga Mindanao kinsa nakasibat ug padayon pa nga gipangita sa kapolisan.

Si PO1 Junard Cinco sa Homicide Section sa kapolisan sa maong dakbayan miingon nga ang duha ka mga suspetsadong tulisan ang positibo nga giila sa traysikol drayber nga si Dionesio Ragpo, nga taga barangay Basak sa maong dakbayan kinsa maoy giluwanan sa mga suspetsado uban sa biktima nga ilang gitulis.

Sa nasayran, nga unang nasigpatan sa mga barangay tanod sa barangay Basak ang suspetsado nga si Sumampong nga nagkadugo ug nanghinaw sa iyang kamot sa naglim-aw nga tubig sa maong dapit.

Dihang giduol kini sa mga barangay tanod kalit kining mikaratil og dagan ug nabiyaan ang bag nga gipanag-iya sa biktima nga gisudlan sa salapi ug mga alahas.

Si Cinco miingon nga pipila ka gutlo ang nakalabay namatikdan sa mga silingan si Penaranda nga nagkadugo usab ang kamot nga nahiuli sa ilang panimalay sa barangay Gun-ob.

Ang mga silingan nga nakadungog sa balita kabahin sa usa ka babayeng gitulis ug gipatay sa dalan S. Osmeña sa nahisgutang lugar nagduda dayon ug mitawag sa kapolisan kinsa padayon pa nga naghimo sa ilang hot operation niadtong higayona.

Ang mga sakop sa Theft and Robbery Section (TRS) Homicide Section ug mga sakop sa Special Weapon and Tactic (SWAT) ug dihang nakamatikod si Penaranda sa paghidangat sa mga polis dali kining mikuha og sundang.

Si SPO2 Roland Nullan nga maoy miduol kang Penaranda ang gihan-an na unta kini sa pagtigbas apan dali kining gipusil ni Insp. Jacinto Mandal sa kamot maong nalagpot ang sundang niini nga miresulta sa iyang pagkasikop.

Dugang pa ni Cinco nga sa ilang nadawat nga taho nga si Sumampong ang nasigpatan sa dakbayan sa Mandaue nga nakasakay og pumpboat sa wala masayring direksyon.   (BANAT NEWS)