Mga peligro nga lugar angay ipahibawo

CEBU, Philippines - Hugtanong giawhag sa hunta probinsiyal sa Sugbo ang mga opisyal sa Mines ang Geo-sciences Bureau (MGB) 7 nga paspasan ang pagpakatap sa kasayoran bahin sa resulta sa pagtuon niini sa mga landslide ug baha sa lainlaing bahin sa Sugbo.

Sa gipalabang nga resolusyon ni Bokal Thadeo Ouano sa ikaunom nga distrito sa lalawigan sa Sugbo kinsa mao usab ang chairman sa committee on environment sa hunta probinsiyal iyang gipadayag ang panginahanglan sa kasayoran sa katawhan sa kasamtangang kahimtang sa mga lugar nga ilang gipuy-an.

Gitataw ni Bokal Ouano nga mahinungdanon ang paghatag og mga pahimangno ngadto sa mga molupyo sa bukirang dapit ug kabaybayonan sa mga kadaut nga masinati nga mugna sa dili matag-ang dagan sa panahon aron mohimo usab kini og ilang kaugalingong mga pagpangandam.

Sayo niini si Ouano nakadawat og taho gikan sa MGB 7 bahin sa mga dapit dinhi sa Sugbo nga sagad lunopan sa tubig o may mga pagdahili sa yuta.

Unya gusto niyang may kopya niini ang kalungsoran aron sila makapangandam sa angay nilang buhaton kun may kusog nga uwan nga masinati sa ilang tagsa-tagsa ka lugar.  (BANAT NEWS)