Kaso sa kapolisan desisyonan na

CEBU, Philippines - Gipahibawo ni PRO-7 Chief Supt. Ager Ontog nga karong Pebrero hingpit nang madesisyonan ang kaso nga giatubang sa 79 ka mga polis sa Central Visayas lakip na ang taga   Sugbo.

Si Ontog nagkanayon nga aduna nay 75 ka kaso ang na-desisyonan samtang upat nalang ang nahabilin ug hayan mahuman kini ugma.

Matud ni Ontog nga sa 79 ka kaso nga giatubang sa mga polis kasagaran niini pulos mga administartive cases diin gihulagway nga gagmay rang kasoha.

Aron mas madali ang paghusay sa mga kaso sa ilang rehiyonal nga buhatan, girilibohan ni Ontog ang hepe sa Investigation and Detective Management Branch (IDMB) sa Cebu Provincial Police Office nga si Sr. Insp. Ruben Cuizon sa miaging adlaw.

Samtang temporaryong gihulip kaniya si Insp. Lamberto Hibaya ang bag-ong na-promote sa pagka opisyal.

Matud ni Ontog nga iya rang ibalik si Cuizon sa CPPO kun hingpit nang mahuman ang pending nga kaso sa mga polis diha sa rehiyonal nga buhatan.

Dili lang dinhi sa Central Visayas nga adunay mga polis nga nag-atubang og kaso, sanglit mas daghan pa didto sa Luzon nga kasagaran niini mga police scalawags, matud pa ni Ontog.

Midugang siya nga sa 75 nga nadesisyonan na adunay nasuspenso, na-demote ug na-dismiss sa serbisyo, apan siya mitataw nga kadtong na-dismiss hatagan pa kini og higayon sa pagduso og motion for reconsideration aron sa pagpabalitok sa maong desisyon.

Giangkon niya nga kining 79 ka mga polis nga nag-atubang karon ug nadesisyonan na, dako kaayo kining butang alang kanila sanglit uban sa desisyon mao ang pagwagtang sa tanang mga benepisyo nga ilang madawat, sama sa bunos ug uban pa.

Giklaro ni Ontog nga leksyon na kini sa ubang mga polis nga magpabadlong sa ilang trabaho kay ang kadagkoan sa PNP dili magpanuko pagtangtang niadtong nakalapas sa lagda sa balaod tungod kay daghan pang gustong mosulod sa PNP nga pulos mga tarong nga tawo.

Kasagaran niining 79 ka polis nga gidisiyonan karon, nagranggo gikan sa PO1, PO2 ug PO3.   (BANAT NEWS)