CEBU, Philippines - Anomaluso ang kapakyas sa kagamhanan sa lungsod sa Compostela sa pagbayad sa ambulansiya dul-ang usa na ka tuig busa gibawi kini sa KIA Motors, ang tindahang gipalitan sa maong sakyanan..
Kini ang gipadayag ni Kongresista Ramon “Red” Durano, VI kinsa wala motuo sa pamahayag sa tresurero sa lungsod nga si Lorenzo Almodiel kinsa miingon nga naa ra ang pundo nga igbabayad sa maong ambulansiya sa panudlanan sa lungsod.
Matud pa ni Durano nga suspendido na si Almodiel sa Ombudsman gumikan usab sa pagkahanaw sa kapin sa P7 milyones nga kuwarta diha sa panudlanan sa lungsod.
“Why would you believe to someone who is not credible,” nagkanayun si Durano.
Ang pundo nga usa ka milyon ka pesos gihatag ni Kongresista Raymond Democrito Mendoza sa Trade Union Congress of the Philippines (TUCP) Partylist nga mao untay igbabayad sa maong ambulansiya niadtong Abril 2010 sa panahon pa ni Mayor Ritchie Wagas.
Apan matud pa ni Almodiel nga langan kaayo ang proseso sa Commission on Audit sa pagbayad sa butang nga paliton sa lungsod.
Si Durano sa iyang bahin dili makatoo nga sa dul-an na sa usa ka tuig wala gihapon makompleto sa lungsod ang gikinahanglan sa COA. Si Durano mipadayag nga gumikan kay walay mga opisyal sa lungsod ang nag-atiman sa panginahanglan sa katawhan, ang mga tawo karon maoy nahimong makalolooy sa gihimong protesta ni Wagas sa paglingkod unta ni Mayor Joel Quiño.
Nanghinaut si Durano nga masulbad na ang maong isyu aron maatiman ang gikinahanglan sa katawhan nga maoy nagpili sa mga opisyal sa lungsod nga midaog sa miaging eleksiyon. (BANAT NEWS)